Ահաբեկչական «Իսլամական պետություն» կազմակերպությունը համացանցում տեսանյութ է տեղադրել Ադրբեջանի կրոնական առաջնորդին ուղղված սպառնալիքներով: Հոլովակը սոցցանցերում հրապարկել է ԻՊ-ի ռուսալեզու «Ֆուրաթ» մեդիախումբը: Ճիշտ է, տեսանյութն արագ հեռացվել է Youtube ալիքից եւ Dailymotion-ից «Օգտագործման իրավունքի խախտում» պատճառաբանմամբ: Սակայն Twitter սոցցանցի NorthCaucasus օգտատերը, որը ներկայանում է որպես Թուրքիայի, Ադրբեջանի եւ Հյուսիսային Կովկասի վերաբերյալ վերլուծաբան եւ Սիրիայում «չափավոր ընդդիմություն» է քարոզում, համառոտ վերապատմել է դիմումի էությունը, հայտնում է haqqin.az-ը:
Տեսահոլովակն այսպես է վերնագրված. «Ուղերձ Ռիբատի հողերից զավթված Ադրբեջանին» (ռիբատը ռազմաճակատի առաջնագիծն է. haqqin.az-ի ճշտումը): Տեսանյութում հանդես է գալիս ծագումով Ադրբեջանից ռուսալեզու գրոհային: Նա իրեն կոչում է «Կովկասի Աբդուլլա» եւ պնդում, որ ծագումով Կուսարյան շրջանի Ուրվա քաղաքից է: Ասում է, թե իսլամ է ընդունել 2001-ին եւ իր խոսքով, արդեն երեք տարի է` Սիրիայում է: Սկզբում նա կռվել է «Ջաբհաթ ան-Նուսրայի» համար, իսկ այժմ տեղափոխվել է ԻԼԻՊ:
Ստոպ կադրերից եւ ենթագրերից դատելով` Ալլահշուքյուր Փաշազադեին Կովկասի Աբդուլլան «թաղուտ» է կոչում (անպատիվ մեկը, որը մոլորեցնում է մարդկանց) եւ խոստանում է կտրել նրա գլուխը: Իսկ սալաֆիտների առաջնորդին ծայրահեղականը մեղադրում է այն բանի համար, որ նա զրպարտում է «խալիֆաթին»: Նման մեղադրանքներով եւ սպառնալիքներով ԻՊ-ից սովորաբար դիմում են կրոնական այն առաջնորդներին, որոնք ակտիվորեն համագործակցում են իշխանությունների հետ եւ ամբողջությամբ աջակցում են նրանց քաղաքականությանը: Թե ճշգրիտ ինչի համար են «Իսլամական պետությունում» պատրաստվում հաշվեհարդար տեսնել Ալլահշուքյուր Փաշազադեի հետ, անհայտ է: «Կովկասի Աբդուլլայի» քողարկող տաք հագուստից եւ շարֆից դատելով` ելույթը տեսագրվել է առնվազն մեկ ամիս առաջ եւ միայն այժմ է հրապարակվում, որպես Կովկասի մահմեդականնների հոգեւոր վարչության ղեկավար Ալլահշուքյուր Փաշազադեի նկատմամբ «Իսլամական պետության» «պաշտոնական» դիրքորոշում:
