Մեր անելիքները սոցիալապես խոցելի ընտանիքներին աջակցություն ցուցաբերելն է, առաջին հերթին՝ երեխաներին։ Այս մասին NEWS.am–ի հետ զրույցում ասաց ՀՀ աշխատանքի եւ սոցիալական հարցերի նախարար Արտեմ Ասատրյանը, որն այսօր Հյուսիսային պողոտայում մասնակցում է NEWS.am–ի ամենամյա բարեգործական ակցիային։
«Երեխաներին մաղթում եմ անհոգ մանկություն, թող բոլորը մեծանան իրենց ընտանիքում՝ շրջապատված սիրով։ Մեր անելիքները սոցիալապես խոցելի ընտանիքներին աջակցություն ցուցաբերելն է, առաջին հերթին՝ երեխաներին։ Սա է մեր քաղաքականությունը։ Մեր քայլերը միտված են ընտանիքների հզորացմանը, որ ծայրահեղ դեպքում լինեն երեխաների խնամքի հաստատությունները»,–ասաց Արտեմ Ասատրյանը։
Նշենք, որ Երեւանի Հյուսիսային պողոտայում, այսօր՝ առավոտյան ժամը 11-ից ընթանում է NEWS.am-ի ամենամյա բարեգործական ակցիան, որից ստացված հասույթն այս տարի ամբողջությամբ կհատկացվի ապրիլին Արցախում զոհված զինծառայողների եւ սոցիալապես անապահով ընտանիքներին, որոնցում կան երեխաներ:
Ակցիայի շրջանակում պաղպաղակ եւ քաղցր ըմպելիքներ են վաճառում հասարակական-քաղաքական գործիչներ, հայկական շոու բիզնեսի աստղերը՝ երգիչ-երգուհիներ, սերիալների հայտնի դերասաններ, հաղորդավարներ, ճանաչված մարզիկներ:
Ակցիան ուղեկցվում է բացօթյա համերգով, որի առաջին հատվածը նախատեսված է մանուկների համար: Բարեգործական ակցիայի այցելուներին սպասում են նվերներ եւ անակնկալներ, երեխաների համար կազմակերպվել են խաղեր, նրանց զվարճացնում են մուլտֆիլմերի հերոսները:
