Գերմանիայի բարձրաստիճան քաղաքական գործիչները միասնական չեն հակառուսական պատժամիջոցները երկարաձգելու հարցում, գրում է The Wall Street Journal-ը:
Պարբերականը նշում է, որ Գերմանիայի կանցլեր Անգելա Մերկելը կարծում է, որ դեռ վաղ է չեղարկել պատժամիջոցները: Ճապոնիայում կայացած G7 գագաթնաժողովում նա նորից խոսել է այդ մասին:
Միաժամանակ Գերմանիայի սոցիալ-դեմոկրատներն ու իշխող կոալիցիայի որոշ անդամներ դեմ են այդ դիրքորոշմանը: Նրանք գտնում են, որ պատժամիջոցները պետք է թուլացնել:
Այսպես՝ ԱԳ նախարար Շթայնմայերն արդեն հայտարարել է, որ հակառուսական պատժամիջոցները կարող են աստիճանաբար չեղարկվել, եւ կոչ է արել դրանք ավելի ռացիոնալ կիրառել:
Էկոնոմիկայի նախարար, Գերմանիայի փոխկանցլեր Զիգմար Գաբրիելը նույնպես կողմ է որոշ պատժամիջոցներ չեղարկելուն:
WSJ-ն գրում է, որ Գերմանիայում հակառուսական պատժամիջոցների պատճառով կոալիցիայում «պառակտում է» նկատվում: Գերմանացի քաղաքագետ, սոցիալ-դեմոկրատ Ռոլֆ Մյութցենիխը պարբերականին հայտնել է, որ իշխող կոալիցիայում տարաձայնություններն արտահայտում են Եվրոպայում պատժամիջոցների հարցի շուրջ վաղուց ի հայտ եկած հակասական կարծիքները: Իտալիան, Հունաստանն ու Հունգարիան միշտ քննադատել են պատժամիջոցներ կիրառելը եւ կողմ են դրանց առաջիկա չեղարկմանը:
Բունդեսթագի արտաքին գործերի հանձնաժողովի ղեկավար Նորբերթ Ռեթթգենը, որը պատժամիջոցների վերականգնման կողմնակից է, ընդգծել է, որ հնարավոր չեղարկումը սպառնում է Եվրամիության եւ ԱՄՆ-ի միջեւ պառակտումով:
