Արարատի մարզի Քաղցրաշեն գյուղի խաղողագործների դեռ անցած տարվա մթերած խաղողի գումարը հունիսի 2-ին կփոխանցվի գյուղացիներին: Այս մասին այսօր՝ մայիսի 30-ին, NEWS.am-ի հետ զրույցում ասաց խաղողագործներից Սաշիկը: Նա նշեց, որ խաղողը մթերած «Վինար» ՍՊԸ-ի տնօրեն Ավետ Գալստյանին վերջնաժամկետ է տրվել՝ մինչեւ հունիսի 2-ը գյուղացիներին փոխանցել խաղողի պարտքը:
«Վարչապետի ու գյուղատնտեսության նախարարության օգնությամբ վարկ է ձեւակերպվել, պետք է այս մի քանի օրվա ընթացքում ստանա եւ մինչեւ չորեքշաբթի մեր պարտքը վճարի: Մենք արդեն չենք էլ հավատում, որ կտան մեր փողերը, բայց սպասում ենք, տեսնենք՝ ինչ կլինի»,-ասաց նա:
Հիշեցնենք, որ գյուղացիներն անցած տարվա մթերած բերքի գումարը մինչ օրս չեն ստացել։ Խաղողը մթերած «Վինար» ՍՊԸ-ն քաղցրաշենցիներին, ինչպես նաեւ 10 այլ գյուղերի բնակիչների պարտք է մոտ 160 միլիոն դրամ:
Քաղցրաշենցիներից բացի, «Վինար» ՍՊԸ-ն խաղողի մթերման համար պարտք է Շահումյան, Այգեպատ, Այգեզարդ, Նարեկ, Ոստան, Վերին Արտաշատ, Նորաշեն, Հնաբերդ, Փոքր Վեդի բնակիչներին: