«Իսլամական պետություն» ահաբեկչական խմբավորումը ծրագրում է հարձակումներ իրականացնել Մարսելում Ռուսաստանի ու Անգլիայի ֆուտբոլի հավաքականների երկրպագուների վրա՝ Եվրոպայի 2016-ի առաջնության խմբային փուլի շրջանակում այդ թիմերի հանդիպումից առաջ, հայտնում է Sun–ը:
Այս տեղեկությունների աղբյուրը Փարիզում ու Բրյուսելում ահաբեկչական հարձակումների ղեկավարի Սալահ Աբդեսլամի նոութբուքում հայտնաբերված տվյալներն են: Հարձակումների ժամանակ ծրագրում են օգտագործել մահապարտ ահաբեկիչների, նաեւ «Կալաշնիկով» ինքնաձիգներ, անօդաչու թռչող սարքեր քիմիական զենքով: Ֆանատների վրա հարձակումները ծրագրվում են հունիսի 11-ին, խաղի օրը:
Ոստիկանները մտավախություն ունեն, որ չնայած Աբդեսլամը կալանավորվել է, բայցեւայնպես ահաբեկիչները չեն հրաժարվի իրենց ծրագրերից:
Աղբյուրի տվյալներով, Ռուսաստանի ու Անգլիայի հավաքականները կարող են թիրախ դառնալ, քանի որ ՌԴ-ն ու Մեծ Բրիտանիան մասնակցել են Սիրիայում ու Իրաքում ահաբեկիչների ռմբակոծությանը:
2015-ի նոյեմբերի 13-ին ահաբեկիչների երեք համակարգված խմբեր մի շարք հարձակումներ են իրականացրել Փարիզում ու Սեն Դենի արվարձանում: Ահաբեկչական գործողությունների հետեւանքով ընդհանուր առմամբ 130 մարդ է զոհվել, ավելի քան 350-ը վիրավորվել է: Սալահ Աբդելսլամին ձերբակալել են մարտի 18-ին Բրյուսելում՝ Մոլենբեք նեգաղթյալների համայնքում հատուկ գործողության ընթացքում: