16-ամյա Խաչիկ Ղազանչյանի սպանության գործով դատարանում հարցաքննվել են նրա ու սպանության մեջ մեղադրվող 18-ամյա Սուրեն Մուրադյանի ընդհանուր ընկերները: Այս մասին NEWS.am-ի հետ զրույցում ասաց տուժող կողմի պաշտպան Մխիթար Բեգյանը:
«6-7 ընկեր հարցաքննվեցին: Բոլորն էլ ասացին, որ լսել են՝ Սուրենն է սպանել Խաչիկին: Ասացին, որ չի եղել վիճաբանություն, Սուրենը հանկարծակի խփել է: Ասացին՝ Խաչիկը համեստ տղա է եղել: Սուրենի մասին էլ ասում էին մեր ընկերն է, չենք տեսել, որ շեղված լինի»,- ասաց փաստաբանը:
Նշենք, որ սպանության մեջ մեղադրվում է Խաչիկի ընկերը՝ 18-ամյա Սուրեն Մուրադյանը:
Սուրեն Մուրադյանի հայրը NEWS.am-ի հետ զրույցում պնդել է, որ Սուրենին դեպքից մեկ ժամ առաջ Խաչիկն ու ընկերները զանգել, հայհոյել են եւ գումար են պահանջել: Դրանից հետո, նրա խոսքով, Խաչիկը ցանկացել է հաշվեհարդար տեսնել Սուրենի հետ, քանի որ նա հրաժարվել է գումար տալ:
Խաչիկին դանակի 14 հարվածով սպանելու մեջ մեղադրվող՝ նրա 18-ամյա ընկեր Սուրեն Մուրադյանին մեղադրանք է առաջադրվել այն բանի համար, որ նա 2016թ. հունվարի 6-ին, կենցաղային հարցերի շուրջ ծագած վիճաբանության ընթացքում Խաչիկ Ղազանչյանին սպանելու դիտավորությամբ իր մոտ եղած սուր կտրող-ծակող առարկայով բազմաթիվ հարվածներ է հասցրել նրա մարմնի տարբեր կենսական կարեւոր նշանակություն ունեցող մասերին` պատճառելով կյանքին վտանգ սպառնացող ծանր մարմնական վնասվածքներ, որոնցից նա դեպքից մոտ մեկ ամիս անց մահացել է: