Ռուսաստանի տնտեսության ճգնաժամային երեւույթները, ինչպես գիտենք, անդրադարձել են նաեւ ԱՊՀ երկրների վրա: Մասնավորապես «ռուսական» տրանսֆերտների հոսքը էապես պակասել է: ՌԴ ԿԲ-ն վերջերս տվյալներ էր հրապարակել այպես կոչված «միջսահմանային փոխանցումների» մասին, որոնք գումարային փոխանցման համակարգերի միջոցով իրականացրել են ֆիզիկական անձինք:
Այդ տվյալների համաձայն՝ ս.թ. առաջին եռամսյակում այդ համակարգերի միջոցով ԱՊՀ երկրներ է փոխանցվել 914 մլն դոլար: Նշենք, որ նախաճգնաժամային Ռուսաստանում 2014-ի նույն եռամսյակում այդ ցուցանիշը 3.7 անգամ մեծ էր՝ 3364 մլն դոլար: Միաժամանակ էապես կրճատվել է մեկ փոխանցման միջին գումարը՝ 365 դոլարից դառնալով 261 դոլար: ԱՄՆ դոլարով կատարվող փոխանցումների վրա ազդել է նաեւ դրա դիրքերի կայունացումը Ռուսաստանում:
Դրամական փոխանցումների համակարգերը համեմատական պարզության պատճառով աշխատանքային միգրանտների շրջանում մեծ ժողովրդականություն են վայելում: Անցյալ տարի այդ համակարգերն ապահովել են Ռուսաստանից ԱՊՀ երկրներ ֆիզիկական անձանց փոխանցումների ավելի քան 27 տոկոսը:
Ի՞նչ արժույթով են Ռուսաստանում բնակվող ֆիզիկական անձինք ԱՊՀ երկրներ գումար փոխանցում: Այդ մասին ՌԴ ԿԲ-ն ունի տարբեր արժույթներով փոխանցումների տվյալներ միայն անցյալ տարվա վերաբերյալ: Սակայն ԱՊՀ երկրներից միայն 2 խոշոր ստացողների՝ Տաջիկստանի եւ Ուզբեկստանի մասին:
Ռուսաստանից Ուզբեկստան բոլոր փոխանցումների ավելի քան 95 տոկոսն իրականացվել է ԱՄՆ դոլարով: Ռուսական ռուբլուն բաժին է ընկել 5 տոկոսից էլ քիչ: Թվում է, թե նման ցուցանիշ պիտի լինի նաեւ Տաջիկստանի դեպքում: Սակայն այստեղ պատկերը հակառակն է. փոխանցումներն իրականացվել են գերազանցապես ռուսական ռուբլով՝ ավելի քան 85 տոկոս: Միայն 1/10-րդ մասին է բաժին ընկել ԱՄՆ դոլարին:
Այդ փաստը կարելի է կապել տաջիկական սոմոնիի նկատմամաբ ռուսական ռուբլո հարաբերականորեն քիչ արժեզրկմամբ (անցյալ տարվա նոյեմբերի 25-ի դրությամբ 5 տոկոսից էլ պակաս): Նույն այդ Ուզբեկստանում ռուբլին այդ նույն ժամանակահատվածում ռուբլին 20 տոկոսով արժեզրկվել էր: Բացառված չէ, որ անդրադարձել են տարադրամի փոխանակման կետերում դոլարի փոխարկման խնդիրները: Անցյալ տարի Տաջիկստանի ԿԲ որոշմամբ՝ փոխանակման կետերը խարդախության համար 2 անգամ «ժամանակավորապես» փակվել են:
Սմբատ Գրիգորյան
