«Հարավկովկասյան երկաթուղին» չի ծանրաբեռնում բյուջեն, ընդհակառակը՝ աշխատատեղեր է ստեղծում: Այս մասին մայիսի 30-ին՝ խորհրդարանում 2015-ի բյուջեի կատարողականը ներկայացնելիս, ասել է տրանսպորտի եւ կապի փոխնախարար Արթուր Առաքելյանը:
Նրա խոսքով՝ «Հարավկովկասյան երկաթուղին» Հայաստանի խոշոր գործատուներից մեկն է (մոտ 3300 մարդ): Թեպետ կոնցեսիոնալ պայմանագիրը «Հարավկովկասյան երկաթուղուն» պարտավորեցնում էր աշխատակիցների հաստիքը պահպանել առաջին 2 տարում, ընկերությունը պլանավորում է պահպանել այդ կանոնը նաեւ հետագայում՝ անկախ նրանից, թե աշխատում է շահույթով թե վնասով:
Նման մոտեցման մասինէ խոսել նաեւ «Ռուսական երկաթուղիներ» ԲԲԸ գլխավոր տնօրեն Օլեգ Բելոզյորովը, որն օրերս Հայաստանում էր եւ «Հարավկովկասյան երկաթուղուն» կարգադրել էր ուշադիր լինել սոցիալական քաղաքականության նկատմամբ: Բացի այդ, 2015-ին ընկերությունը մոտ 4 մլրդ դրամի հարկ է վճարել:
«Դրանից հետո դժվար է պնդել, թե Հայաստանը ստիպված է վճարել ընկերության աշխատանքի համար: Ընկերությունը չի փակում վնասով աշխատող երթուղիները՝ սոցիալական քաղաքականությունից ելնելով: Կառավարությունը 2015-ին սուբսիդավորել է 580 մլն դրամ, սակայն իրական վնասը մոտ 8 մլրդ է եղել: Կառավարությունը, համաձայն կոնցեսիոնալ պայմանագրի, սուբսիդավորում է այնքան, որքան ընկերությունը կոնցեսիա է վճարում: Այլ կերպ ասած՝ պետությունը սեփական գումարը չի վճարում երկաթուղուն»,- ասել է Առաքելյանը:
