Հայաստանի երկաթուղիների ռուսական կոնցեսիան չի սպառնում երկրի անվտանգությանը: Այս մասին մայիսի 30-ին՝ խորհրդարանում 2015-ի բյուջեի կատարողականը ներկայացնելիս, ասել է տրանսպորտի եւ կապի փոխնախարար Արթուր Առաքելյանը՝ պատասխանելով ԱԺ պատգամավոր Խաչատուր Քոքոբելյանի հարցին:
Իր ելույթում Քոքոբելյանը դժգոհություն է հայտնել այն կապակցությամբ, որ Հայաստանի գրեթե բոլոր ենթակառուցվածքները ռուսական ընկերությունների կառավարման տակ են գտնվում: «Ժամանակին սխալ է թույլ տրվել: Նման ռազմավարական օբյեկտները չի կարելի այլ երկրի հանձնել: Դա անվտանգության հարց է: Կապը՝ ռուսներին, երկաթուղին՝ ռուսներին…», -ասել է Քոքոբելյանը:
Առաքելյանը, դրան ի պատասխան, պատասխանել է, որ Հայաստանի համապատասխան կառույցները պլաններ ունեն ու անհրաժեշտ փորձարկումներ են կատարում ճանապարհին: Դրանց արդյունքում կարելի է ասել, որ անհանգստանալու պատճառ չկա: «Եթե, Աստված չանի, անվտանգության բարձր ռեժիմով գործելու անհրաժեշտություն ծագի, ապա, անկախ կոնցեսիայից, կառավարումն անցնում է բացառապես ՀՀ-ին: Նման դրույթ կա կոնցեսիոնալ պայմանագրի մեջ», - ասել է փոխնախարարը:
