Ռուսաստանը, Գերմանիան եւ ԱՄՆ-ն Նյուրնբերգյան դատավարության մասին «Հավիտյանս հավիտենից» վերնագրով քաղաքական թրիլլեր կնկարահանեն:
Ըստ ՌԻԱ Նովոստիի, նկարահանումներով կզբաղվի «Սինեմա Փրոդաքշըն» ռուսական ընկերությունը՝ գերմանական եւ ամերիկյան կինոընկերությունների հետ համատեղ: Այս մասին հայտարարել է ժապավենի պրոդյուսեր Մարիա Ժորոմսկայան:
Նա հիշեցրել է, որ 2016 թվականի հոկտեմբերին լրանում է Նյուրնբերգյան դատավարության ավարտի 70-ամյակը: «Սցենարի հիմքում Ալեքսանդր Զվյագինցեւի գիրքն է պատերազմական հանցագործների դատավարությունների մասին»,- նշել է նա:
«Մեզ թույլատրել են նկարահանումներ կատարել Բավարիայում, այն դատարանի դահլիճում, որտեղ ընթացել է դատավարությունը, բանտում եւ այլ վայրերում»,- նշել է պրոդյուսերը՝ հավելելով, որ ներկայում նկարահանումների նախապատրաստական աշխատանքներ են իրականացվում:
Նյուրնբերգում միջազգային ռազմական դատարանը ստեղծվել է ԽՍՀՄ-ի, ԱՄՆ-ի, Մեծ Բրիտանիայի եւ Ֆրանսիայի նախաձեռնությամբ՝ նացիստական Գերմանիայի ղեկավարության հանցագործությունների հետաքննության նպատակով:
