«Արմավիր» ՔԿՀ-ում հունվարի 4-ին կախված հայտնաբերված կալանավոր, 21-ամյա Անզոր Կարապետյանի մասնակցությամբ ծեծկռտուքի գործի քննությունը ավարտվել է: Այս մասին NEWS.am-ի հետ զրույցում ասաց նրա փաստաբան Անի Չատինյանը:
«Անզոր Կարապետյանի մարմնական վնասվածքների մասով գործը կարճվել է, ըստ նախաքննական չի բացահայտվել, թե ովքեր են հարվածներ հասցրել: Իր մեղադրանքի մասով էլ կարճվել է, քանի որ մահացած է»,- ասաց Անի Չատինյանը:
Անզոր Կարապետյանին ինքնասպանության հասցնելու գործով նախաքննությունը շարունակվում է:
Անզոր Կարապետյանը մահանալուց ժամեր առաջ է տեղափոխվել «Արմավիր» ՔԿՀ: Նա 2015 թ. դեկտեմբերի 31-ին Արմավիր քաղաքում մասնակցել է ծեծկռտուքի, ինչից հետո ներկայացել է ոստիկանություն, նրան ձերբակալել են, այնուհետեւ՝ 2016 թ. հունվարի 3-ի երեկոյան դատարանի որոշմամբ կալանավորել եւ տեղափոխել «Արմավիր» ՔԿՀ:
Հիշեցնենք, որ Անզոր Կարապետյանի մահվան վերաբերյալ պաշտոնական հաղորդագրություն չի եղել: 2016 թ. հունվարի 11-ին նրա հարազատները դիմել են Հելսինկյան քաղաքացիական ասամբլեայի Վանաձորի գրասենյակ, պատմել, որ հունվարի 4-ին «Արմավիր» ՔԿՀ-ից իրենց հայտնել են, որ Ա․Կարապետյանը ինքնասպանություն է գործել, մինչդեռ իրենք այդ վարկածին չեն հավատում, քանի որ 21-ամյա տղայի մարմնի վրա բռնության հետքեր են եղել, ներքին օրգանները վնասված են եղել:
Մահվան փաստով քրեական գործ է հարուցվել ինքնասպանության հասցնելու հատկանիշներով: Նրա ծնողները պնդում են, որ իրենց որդին չէր կարող ինքնասպանություն գործել:
