ՀԱԿ խմբակցության ղեկավար Լեւոն Զուրաբյանի` տասը մատը թանաքոտելու առաջարկը պետք է մանրամասնությամբ ուսումնասիրության ենթարկել: Այս մասին NEWS.am-ի հետ զրույցում ասաց Կենտրոնական ընտրական հանձնաժողովի ղեկավար Տիգրան Մուկուչյանը:
«Երբ մենք ցանկանում ենք հավաքագրել մատնահետքերը, պետք է հստակ ունենանք պատկեր, որովհետեւ մենք գործ ունենք սահմանափակ ժամանակահատվածի հետ: Արդյոք նշված ժամանակահատվածում հնարավոր է կազմակերպել այդ առաջարկը, թե՞ ոչ, եւ ինչպիսի միջոցների ներդրում է պահանջում, խոսքը վերաբերում է ե՛ւ նյութական միջոցներին` սարքավորումներին, ե՛ւ միաժամանակ այլ ռեսուրսների: Եթե սա թողնում ենք քաղաքացիների բացարձակ կամքին, այսինքն` ինչ-որ տեղ հայտարարվում է, որ որեւէ հասցեով գտնվում է այդ սարքավորումը, կարելի է գնալ հանձնել մատնահետքերը եւ այլն, էս պարագայում, անկեղծ ասած, ես կարծում եմ, որ մինչեւ քվեարկությունը ոչ բոլորը ակտիվորեն կմասնակցեն այս գործընթացին»,-նշեց Մուկուչյանը:
Ինչ վերաբերում է Զուրաբյանի այն հիմնավորմանը` եթե այդ առաջարկը ընդունվի, ապա ուռճացված ցուցակներն այլեւս մաքրելու անհրաժեշտություն չի լինի, քանի որ դա ապացուցված արդյունավետ միջոց է, Մուկուչյանը նշեց. «Խնդիրը հետեւյալն է, որ նշված առաջարկության իրացման հետ կապված անհրաժեշտ է ուսումնասիրել ամբողջ հնարավորությունը այդ գործընթացն իրականցնելու համար»:
Նշենք, որ Ղրղզստանում իրականացվում է այս մեթոդը, ինչի կապակցությամբ ԿԸՀ ղեկավարն ասաց, թե այնտեղ մեծ ժամանակահատված է պահանջվել այդ մեխանիզմը ներդնելու համար:
«Եթե չեմ սխալվում այնտեղ մեծ ժամանակահատված է այդ գործընթցաին տրամադրվել, բացի դրանից բավականին շատ միջոցներ են ներդված եղել եւ այդ պայմաններում է իրականացվել դա: Այսինքն`ամեն ինչը քննարկման առարկա պետք է դառնա»:
Նշենք, որ Ընտրական օրենսգիրքն անցած շաբաթ Ազգային ժողովում ընդունվել է երրորդ ընթերցմամբ: Վերահսկողական մեխանիզմների շուրջ քննարկումները ամենայն հավանականությամբ վերսկսվելու են ու եթե հաջողվի ընդդիմությանն ու իշխանությանը վերահսկողական մեխանիզմների դրույթների շուրջ կոնսենսուսի հասնել, ապա փոփոխությունները հետագայում կընդգրկվեն օրենսգրքում: