Այս տարվա հոկտեմբերին Թեհրանում սպասվում է հանդիպում հայ եւ իրանցի գործարարների միջեւ: Այս մասին NEWS.am-ի թղթակցին ասաց «Հայաստան» համահայկական հիմնադրամի Իրանի տեղական մարմնի ներկայացուցիչ Արին Քարիմյանը:
«Պատժամիջոցների վերացումից հետո հոսքը եվրոպական երկրներից եւ այցը դեպի իրանական շուկա աշխուժացել է: Մենք ծրագրեր ունենք, դրանցից մեկն էլ Armenian Expo-ն է Թեհրանում, որը պլանավորում ենք անցկացնել հոկտեմբերին Թեհրանում: Կարծում եմ` հայ- իրանական գործարար հարաբերությունները զարգանում են»,- ասաց Արին Քարիմյանը:
Երկու ոլորտ կա, ըստ Քարիմյանի, որով Հայաստանը կարող է մտնել իրանական շուկա` ՏՏ ոլորտ եւ տուրիզմ. «Երկու ոլորտով էլ արդեն զարգացում ունենք: Հայաստանը մեծ շանսեր ունի IT ոլորտով մտնել իրանական շուկա, իհարկե ինտերնետի գծով արդեն մտել ենք, մնում է մնացած ուղղությունները զարգացնել»: