Ֆրանսիական Hermes նորաձեւության տան ադամանդներով զարդարված պայուսակը Հոնկոնգում աճուրդում վաճառվել է ռեկորդային 2,32 մլն հոնկոնգյան դոլար (ԱՄՆ-ի ավելի քան 300 հազար դոլար) գնով, ասված է Christie's աճուրդի տան կայքում, հայտնում է «ՌԻԱ Նովոստին»:
Կոկորդիլոսի կաշվից Himalaya Niloticus Crocodile Diamond Birkin նմուշը` ոսկու տարրերով եւ 18 կարատ ադամանդներով զարդարված, ձեռք է բերել անհայտ գնորդը, որը հեռախոսով է խաղադրույքներ կատարել: Փորձագետներն ակնկալում էին, որ 2008-ին թողարկված «հազվագյուտ, պահանջված» նմուշը կվաճառվի առնվազն հոնկոնգյան երկու մլն դոլարով:
«Սա աշխարհում աճուրդի ընթացքում վաճառված կանացի պայուսակի համար վճարված ռեկորդային գին է», — Ֆրանս Պրես գործակալությանը հայտնել է Հոնկոնգում Christie's առեւտրի տան ներկայացուցիչ Բինգլ Լին (Bingle Lee):
Նախորդ ռեկորդը պատկանում էր Hermes-ի` կոկորդիլոսի կաշվից մուգ վարդագույն, ոսկե զարդարանքներով պայուսակին, որն անցյալ հունիսին Հոնկոնգում Christie’s-ի աճուրդին վաճառվել էր 221 հազար դոլարով: