Նադեժդա Սավչենկոն լրագրողներին համեմատել է բորենիների հետ՝մեկնաբանելով իր ժամանումը Կիեւի օդանավակայան, որտեղ նրան շրջապատել էին լրատվամիջոցների բազմաթիվ ներկայացուցիչներ:
Հայտնվելով հայրենիքում՝ Սավչենկո օդանավակայանի շենքից դուրս է եկել բոբիկ՝ ամբոխի «Փառք Ուկրաինային» բղավոցների ուղեկցությամբ: Լրագրողները միանգամից շրջապատել էին նրան ու սկսել հարցեր տալ, բայց նա պահանջել էր, որ հարգեն «մարդու անձնական տարածքը» ու հետ գնան: Սավչենկոն ներողություն է խնդրել նրանցից, ում իր դիրքորոշումը չափից կտրուկ է թվացել:
«Ամենածանր օդանավակայանում էր: Լրագրողների խելագար հարձակում, քանի որ կներեք, բայց դուք՝ լրագրողներդ պակաս շներ չեք: Թեկուզ ասում են, որ լրագրողների մասին վատ արտահայտվել չի կարելի, բայց դուք բորենիներ եք, պատրաստ եք հարձակվել ու հոշոտել»,- ասել է Սավչենկոն «112 Ուկրաինա» հեռուստաալիքի եթերում:
Իր առաջին աշխատանքային օրը Սավչենկոն բացումից մի քանի ժամ առաջ էր եկել Ռադա: Նա ստիպված է եղել սպասել նիստի բացումին՝ այգում մենակ նստած:
