Վերջին 5 տարվա ընթացքում առնվազն 30 կին է սպանվել նախկին կամ ներկա զուգընկերոջ, կամ ընտանիքի անդամի կողմից: Այս մասին, այսօր՝ մայիսի 31-ին, լրագրողների հետ հանդիպման ժամանակ նշել է «Ընտանեկան բռնության և կանանց սպանության դեպքերը Հայաստանում» նոր զեկույցի հեղինակ, Կանանց աջակցման կենտրոնի ներկայացուցիչ Անի Ճիլոզեանը:
Նրա խոսքով, այս տվյալները թերի են, որովհետեւ շատ դեպքերում կնասպանության դեպքերը չեն գրացվում, կամ գրանցվում են որպես ինքնասպանություն:
«Հիմնականում սպանված կանայք եղել են 20-40 տարեկան, հիմնական մասը գյուղից է եղել (63 տոկոս): Դեպքերի մեծ մասը եղել է հենց տան ներսում: Սպանված 30 կանանցից 21-ն ապրելիս է եղել բռնարարի հետ նույն տանը: Նրանցից 4-ը փորձել է խզել իրենց հարաբերությունները»,- ընդգծեց Ճիլոզեանը:
Հիմնականում կնասպանությունը եղել է դանակահարությամբ, խեղդամահ անելով, վիզը կտրելով եւ բութ առարկայով հարվածելով: «Այսինքն դաժան ձեւով սպանվել են: Առնվազն 7 երեխա ականատես է եղել մոր սպանությանը, որից երեքը ֆիզիկական վնասվածքներ են ստացել»,-ասաց նա:
Ճիլոզեանի խոսքով, կնասպանություն իրականացրածների պատիժը միջինում եղել է 9 տարի, եթե իհարկե, պատիժ եղել է ընդհանրապես. «30-ից միայն 4-ն են այս պահին դատապարտված: 16 դեպքում եղել է հետաքննություն, հարուցվել է քրգործ, բայց դեռ դատավճիռ չկա: Ընդհանրապես գործ չի հարուցվել մեկ դեպքում, քանի որ որակվել է ինքնասպանություն»: