Ռուսական գազի սպառման դիմաց Բելառուսի ընդհանուր պարտքը հասել է 200 մլն դոլարի: «Գազպրոմը»՝ որպես վառելիքի արտադրող եւ մատակարար, արդեն դատարանում 125 մլն դոլար է պահանջում եւ հայց է պատրաստում պարտքի մնացած մասով: Այս մասին հայտնել է «Գազպրոմի» կառավարման փոխնախագահ Ալեքսանդր Մեդվեդեւը, փոխանցում է RIA Novosti-ն:
«Գազպրոմ էքսպորտի» նախագահ Ելենա Բուրմիստրովան նշել է, որ գինը Բելառուսի համար սահմանվել է միջկառավարական համաձայնագրով: Դրա փոփոխության համար պետք է փոխել այդ համաձայնագիրը:
Մայիսի 28-ին ՌԴ էներգետիկայի նախարար Ալեքսանդր Նովակը հայտնել էր, որ Մոսկվան չի պլանավորում Մինսկի համար փոխել գազի գինը 2016-ի երրորդ եռամսյակում: Նախարարի խոսքով՝ վառելիքի արժեքը Բելառուսի համար պետք է որոշվի գործող պայմանագրով: