ՌԴ նախագահ Վլադիմիր Պուտինը հեռանկարային է անվանել ԵՏՄ միասնական տեղեկատվական տարածք ստեղծելու գաղափարը, հայտնում է «ՌԻԱ Նովոստին»:
«Մեզ միանգամայն հեռանկարային է թվում միասնական տեղեկատվական տարածք ստեղծելու գաղափարը: Լավ կլիներ հանձնաժողովին առաջարկել այս կապակցությամբ պատրաստել իրենց նկատառումները»,- ասել է Պուտինը՝ ելույթ ունենալով Գերագույն եվրասիական տնտեսական խորհրդի ընդլայնված կազմով նիստի ժամանակ:
ՌԴ նախագահը հիշեցրել է, որ ընթացիկ տարում կսկսի աշխատել ընդհանուր շուկան՝ դեղորայքի ու բուժապրանքների ոլորտում, որը սոցիալական մեծ նշանակություն ունի:
Բացի դրանից, աստիճանաբար զարգանում է նաեւ համագործակցությունը նորարարության ոլորտում, ինտեգրացիոն գործընթացի անբաժան բաղկացուցիչն է ծառայությունների առեւտրի ազատականացումը, այս տարի շինարարության ու նախագծման ոլորտում, գիտական հետազոտությունների անցկացման, նաեւ զբոսաշրջության ոլորտի օրենսդրությունների ներդաշնակեցման «ճանապարհային քարտեզներ» է պետք ընդունել: Միասնական կանոնները, նրա խոսքով, արդեն ընդգրկում են 43 սերվիսային ոլորտներ, կամ ԵՏՄ–ում արտադրվող ծառայությունների ընդհանուր ծավալի ավելի քան 50 տոկոսը: