Հայաստանի պետական պարտատոմսերի պետական պարտքի պայմաններն ավելի շահավետ են դարձել: Այս մասին մայիսի 31-ին խորհրդարանում ֆինանսավարկային եւ բյուջետային հարցերով հանձնաժողովի նիստում ասել է ֆինանսների փոխնախարար, գլխավոր գանձապետ Ատոմ Ջանջուղազյանը:
Եթե 2015-ի առաջին եռամսյակի վերջին միջին ժամկետը կազմում էր 1743 օր, ապա 2016-ի նույն ժամանակահատվածում՝ 1949 օր: Դա տեղի է ունեցել կարճաժամկետ պարտատոմսերի տեսակարար կշռի նվազման արդյունքում՝ 11.7 տոկոսից 6.2 տոկոս: Միջնաժամկետ պարտատոմսերի բաժինը կազմել է 50.3 տոկոս, իսկ երկարաժամկետինը՝ 43.2 տոկոս: Միաժամանակ մի փոքր վատթարացել է եկամտայնության ցուցանիշը՝ 13.72 տոկոսից աճել է 14.03 տոկոս: Շրջանառության մեջ գտնվող պարտատոմսերի ընդհանուր նոմինալը 2016-ի առաջին եռամսյակի վերջին կազմել է 339 մլրդ դրամ:
