Լեռնային Ղարաբաղում ադրբեջանական ագրեսիայի հետեւանքով վիրավորված Արման Լազգիյանն արդեն մի քանի օր է՝ Գերմանիայի Համբուրգ քաղաքում է: Տրախեոստոմիկ խողովակը հեռացնելուց հետո նա կարողանում է ինքնուրույն շնչել, իսկ բժիկշկներն ու հարազատները կարող են լսել նրա ձայնը: Այս մասին NEWS.am-ի թղթակցին ասել է Արմանի հայրը՝ Միքայել Լազգիյանը:

Այսօր գերմանացի բժիշկները մի քանի ստուգում են կատարել. նրանք զննել են Արմանի թոքերը եւ կերակրափողը՝ դրանց վիճակը գնահատելով բավարար: Միաժամանակ նրանք հանել են տրախեոստոմիկ խողովակը, եւ Արմանը հիմա կարող է ինքնուրույն շնչել: Ավելին՝ առանց խողովակի նրա ձայնն արդեն լսելի է, իհարկե, դեռ շատ խոսել չեն թողնում. պետք է սկզբում վզի վերքը լավանա:

Վաղը գերմանացի մասնագետները պլանավորում են սկսել Արմանի ողնաշարի զննումը: Գերմանիա ժամանելուց հետո հետազոտությունները ցույց տվեցին, որ Արմանի մոտ ողնուղեղի հեղուկի շրջանառությունը խափանված չէ, եւ դա շատ լավ նորություն է: Սակայն Արմանի նյարդերի վիճակը դեռ պետք է ստուգել:

Հոր խոսքով՝ Արմանի տրամադրությունը մարտական է եւ դրական: Բժիշկներն աստիճանաբար լուծում են եղած խնդիրները եւ նրան պատրաստում են ռեաբիլիտացիայի:

Հիշեցնենք, որ Արման Լազգիյանը ապրիլի սկզբին Լեռնային Ղարաբաղի դեմ Ադրբեջանի սանձազերծած ագրեսիայի ժամանակ ողնաշարի վիրավորում էր ստացել՝ ողնուղեղի վնասվածքով եւ տեղափոխվել «Էրեբունի» ԲԿ:

Չնայած Հայաստանի կառավարությունը որոշում է կայացրել, որի համաձայն՝ այն վիրավոր զինծառայողները, որոնց տեղի բժիշկները չեն կարողանում օգնել, բուժումը ստանալու են այլ երկրներում, առողջապահության նախարարը բազմիցս հայտարարել է, որ այդ որոշումը չի տարածվում Արմանի վրա, քանի որ նրա բուժումը հնարավոր է այստեղ կազմակերպել: Ամեն դեպքում, նրանց ծնողները որոշել են ինքնուրույն կազմակերպել որդիների բուժումն արտերկրում, եւ սկսել են միջոցներ հավաքագրել: Օգնել են նաեւ հասարակ քաղաքացիները, որոնք գումար են փոխանցել Արմանի անունով բացված հաշվեհամարին:

Լուսանկարները տրամադրել է Արմանի հայրը