Չի կարելի գեներալսկի հագուստներ հագնել, կոլխոզի նախագահի հայտարարություններ անել, ամոթ է, մարդիկ մեզ լսում են, մեր վրա խնդում են: Այս մասին, «ՍիվիլՆեթ»-ին տված հարցազրույցում նշել է Լեռնային Ղարաբաղի պաշտպանության բանակի նախկին հրամանատար, ԼՂՀ պաշտպանության նախկին նախարար, գեներալ-լեյտենանտ Սամվել Բաբայանը:
«Հո նրանով չի, որ Բաքու թեյ խմենք: Կարաք թեյ խմեք, բայց վախում եմ՝ իրենք ավելի շուտ հասնեն Երեւան թեյ խմելու: Չի կարելի գեներալսկի հագուստներ հագնել, կոլխոզի նախագահի հայտարարություններ անել, ամոթ է»,- ասել է Բաբայանը:
Նրա խոսքով, ադրբեջանական քաղաքականությանը հակադրելու համար ռեսուրսներ են պետք: «Հայաստանը 200 միլոն դոլարի վարկ է վերցնում, փորձում է գնել նույնատիպ «Սմերչ», «Տոս» եւ այլն: Եթե իրոք դա են գնում, դա սխալ է, թյուրիմացություն է: Մենք չենք կարող բոլոր զենքերը, ինչ ունի Ադրբեջանը, գնենք, ասենք «ока за ока»՝ իրենք մեզ են խփում, մենք իրենց: Նախ մենք չենք կարող այդքան արկ գնել, բերել Հայաստան, սկսենք ռմբակոծել իրենց, երբ իրենք բոլոր արկերի տեսակներն իրենց մոտ արտադրում են: Դուք պատկերացրեք՝ ամբողջը թափվի մեր քաղաքների, գյուղերի վրա: Ադրբեջանը Նախիջեւանում ռեակտիվ համակարգեր է տեղադրում: Ո՞ւմ համար է դնում: Ղարաբաղին խփելու համա՞ր է դնում: Ղարաբաղին խփելու համար Ղարաբաղի դիմաց կդնի: Հակառակորդը առիթից օգտվելու է եւ խփելու է մինչեւ անգամ Երեւանին: Նախիջեւանից Երեւան 42 կմ է, իսկ այդ հրթիռային համակարգն աշխատում է 70-150 կմ-ից: Մենք կարո՞ղ ենք պաշտպանվել դրանից»,-ընդգծել է Սամվել Բաբայանը՝ հավելելով, որ հայկական կողմը պետք է ոչ թե հետեւի Ադրբեջանի օրինակին եւ նույնատիպ զենքեր փորձի գնել, այլ իր ռազմավարությունը մշակի Ադրբեջանի դեմ:
Անդրադառնալով կորցրած 800 հեկտար տարածքին՝ Սամվել Բաբայանն արձագանքել է. «Ես չգիտեմ, ով ա մետրով չափել՝ 800 ա, թե 1800…: Ինչ վերաբերում է էդ դիրքերին, կոնկրետ Մարտակերտի ուղղությամբ, դրանք երկակի ռազմավարական կետեր էին, նախ ապահովում էին բնակչությանն ապրելու համար, հողերը Ղարաբաղի բնական սահմաններն էին, երկրորդ՝ այդ տարածքից մեր բռան մեջ էր ամբողջ հարթավայրային հատմավծը՝ Կիրովաբադից, Միրբաշիրով ու Բարդայով: Հիմա մեկն ասում ա, թե էս հողերը ստրատեգիկ էին, մեկն ասում է՝ ստրատեգիկ չէին… Էդ մարդիկ չտեսած ի՞նչ են հասկանում: Չկան ոչ ստրատեգիկ դիրքեր, հատկապես, Մարտակերտում, բայց դա տրագեդիա չէ, պատերազմի ժամանակ կարող է հետ էլ գնան, բայց պետք է դա մտածված լինի, ոչ թե անիմաստ կորցնենք: Սա է խնդիրը»,- նշել է նա: