Լոռու մարզի Շնող գյուղում մայիսի 18-ի գիշերը իր տունը հրդեհած հոգեկան շեղումներ ունեցող 33-ամյա տղամարդուն տեղափոխել են Վանաձորի հոգեբուժարան։ NEWS.am-ի հետ զրույցում Շնողի գյուղապետ Հովիկ Սահակյանը նշեց, որ 33-այա տղամարդու հարազատները ցանկանում են, որ նրան տեղափոխեն Սեւանի հոգեբուժարան, քանի որ այնտեղ նրան կարող են տեւական ժամանակ պահել, իսկ Վանաձորի հոգեբուժարանում՝ ոչ։
«Հարազատները ցանկանում են, որ Սեւանի հոգեբուժարան տեղափոխեն, Վանաձորում չեն կարող երկար պահել նրան, բայց Սեւան էլ տեղափոխելու համար փաստաթղթեր են հարկավոր, հիմա այդ գործընթացով են զբաղված»,-ասաց նա։
Գյուղապետի խոսքով՝ հոգեկան շեղումներ ունեցող տղամարդու եղբայրը, որը տան հրդեհից առաջ նրա հետ էր ապրում, այժմ բնակվում է իրեն պատկանող խանութին կից տանը։
Ավելի վաղ տեղեկացրել էինք, որ մայիսի 18-ին, ժամը 03.48-ին ահազանգ է ստացվել, որ հրդեհ է բռնկվել Լոռու մարզի Շնող գյուղի տներից մեկում: Հրդեհը մեկուսացվել է ժամը 06.00-ին, մարվել՝ 08.02-ին: Տունն ամբողջությամբ (100 քմ) այրվել է (բացի ննջասենյակից՝ 30 քմ):
Նշենք, տղամարդը պատմել էր, որ տան հրդեհն առաջացել է այն բանից հետո, երբ որոշել է վառել անկողինը։ Հոգեկան շեղումներ ունեցող տղամարդը տանը ապրել է իր եղբոր հետ, որն այդ պահին իրենց խանութում աշխատանքի է եղել:
