2016-ի առաջին եռամսյակում երրորդ երկրներից Հայաստան ներմուծումը եւ դրանցից գանձվող հարկերը նվազել են: Այս մասին մայիսի 31-ին խորհրդարանում ֆինանսավարկային եւ բյուջետային հարցերով հանձնաժողովի նիստում ասել է ՊԵԿ փոխնախագահ Արմեն Ալավերդյանը:
«Ներմուծումը մեզ մոտ ավանդաբար գերակշռում է արտահանման ծավալները: Ինչ-որ չափով դա մտահոգության տեղիք է տալիս, սակայն, ինչպես ասվում է, չկա չարիք, առանց բարիքի: Ներմուծումը հարկման ամենակարեւոր օբյեկտներից է: Այդ պատճառով դրա կրճատումը նույնպես մտահոգիչ է»,- ասել է Ալավերդյանը:
Մասնավորապես 2016-ի հունվար-մարտ ժամանակահատվածում 15.2 մլրդ դրամով պակասել են երրորդ երկրներից ներմուծման ծավալները: Դրանցից միայն 9.3 մլրդ դրամը փոխհատուցվել է ԵՏՄ երկրներից ներմուծման ԱԱՀ-ի հաշվին: Իսկ Ընդհանուր առմամբ ներմուծման՝ հարկման ենթակա սեկտորը պակասել է 14.9 մլրդ դրամով կամ 13 տոկոսով: Եթե խոսենք ԱԱՀ գանձումների ընդհանուր նվազման մասին, ապա 2016-ի առաջին եռամսյակում այն կազմել է 10.1 մլրդ դրամ կամ 11.5 տոկոս: Այդ թվում՝ սահմանին գանձվել է 13.7 մլրդ դրամով ավելի քիչ, իսկ ներքին շրջանառությունից՝ 3 մլրդ դրամով ավելի շատ:
