Վարչապետ Հովիկ Աբրահամյանն այսօր ընդունել է Իրանի Իսլամական Հանրապետության արդարադատության նախարար Մուստաֆա Փուրմոհամմադիին:
Վարչապետը ողջունել է Իրանի արդարադատության նախարարի այցը մեր երկիր եւ համոզմունք հայտնել, որ այն նոր մակարդակի կբարձրացնի դատաիրավական ոլորտում երկկողմ համագործակցությունը: Հովիկ Աբրահամյանը նշել է, որ վերջին տարիներին երկու երկրների կառավարությունների միջեւ հարաբերություններն ակտիվ զարգանում են, ինչին էապես նպաստում են բարձրաստիճան պաշտոնական փոխայցերը: Կառավարության ղեկավարն ընդգծել է, որ Հայաստանը կարեւորում է դարավոր բարեկամ Իրանի հետ բազմաոլորտ համագործակցության զարգացումն ու խորացումը:
Պարոն Փուրմոհամմադին շնորհակալություն է հայտնել ջերմ ընդունելության համար եւ արդյունավետ գնահատել իր այցի շրջանակում ունեցած պաշտոնական հանդիպումները: Նրա խոսքով՝ Հայաստանի եւ Իրանի փոխհարաբերությունները ռազմավարական նշանակություն ունեն, եւ Իրանը հետեւողական է երկկողմ կապերն էլ ավելի ընդլայնելու եւ սերտացնելու հարցում: Պարոն Փուրմոհամմադին բարձր է գնահատել իրանահայ համայնքի դերը երկու ժողովուրդների դարավոր բարեկամության ամրապնդման ու խորացման գործում:
Հանդիպմանը զրուցակիցները մտքեր են փոխանակել տարբեր ոլորտներում հայ-իրանական համատեղ ծրագրերի ընթացքի, ինչպես նաեւ երկկողմ ու բազմակողմ տնտեսական համագործակցության զարգացման հեռանկարների շուրջ եւ վերահաստատել հայ-իրանական հարաբերություններն առավել սերտացնելու եւ խորացնելու փոխադարձ պատրաստակամությունը: Անդրադառնալով տարածաշրջանային խնդիրներին՝ կողմերը կարեւորել են անվտանգության, խաղաղության ու կայունության ապահովումը: