Եթե Լեռնային Ղարաբաղն ուզում է հակամարտության վճռորոշ կողմ լինել, պիտի այժմ դժգոհություն հայտնի: Այդ մասին NEWS.am-ի թղթակցի հետ զրույցում հայտնել է «Մոդուս Վիվենդի» վերլուծական կենտրոնի ղեկավար, փորձագետ Արա Պապյանը:
Նրա խոսքով, եթե ոչինչ չփոխվի, Լեռնային Ղարաբաղի Հանրապետությանը բանակցությունների սեղանի մոտ կհրավիրեն այն դեպքում միայն, երբ ամեն ինչ արդեն որոշված կլինի: «Իգոր Պոպովը միշտ ասել է, որ Ղարաբաղն ինչ-որ փուլում պետք է նստի բանակցությունների սեղանի մոտ, սակայն այն բանից հետո միայն, երբ ամեն ինչ որոշված լինի: Եթե որեւէ փաստաթուղթ ստորագրվի եւ Լեռնային Ղարաբաղին հրավիրեն բանակցությունների, ղարաբաղյան կողմին կասեն, որ ամեն ինչ արդեն որոշված է, իսկ իրենից պահանջվում է միայն ուրախանալ եւ ծափահարել», - նշել է Պապյանը: Որեւէ բանից անկախ, ընդգծել է նա, Ղարաբաղը պետք է ներկա լինի բանակցությունների բոլոր փուլերում: «Հայաստանի իշխանությունները ինչ-որ փուլում պետք է հայտնեն, որ այլեւս հանդես չեն գա Ղարաբաղի անունից եւ միջազգային հանրությանը կոչ անեն հետագա բանակցությունները վարել ԼՂՀ-ի իշխանությունների հետ: Չեմ կարծում, թե դա կհանգեցնի պատերազմի», - նշել է Պապյանը` հավելելով, որ բանակցային գործընթացն ինքնին չի կանգնեցնում ռազմական գործողությունները:
Հիշեցնենք, որ ԵԱՀԿ-ի Մինսկի խմբի ռուսաստանցի համանախագահ Իգոր Պոպովը NEWS.am-ի թղթակցին հայտնել էր, որ Լեռնային Ղարաբաղը պետք է վերադառնա բանակցությունների սեղանի մոտ: «Ենթադրում եմ, որ որոշակի փուլում, օրինակ` շրջանակային պայմանավորվածության ձեռք բերումից հետո, ղարաբաղցիները պետք է վերադառնան բանակցությունների սեղանի մոտ: Չէ որ խոսքն այն մարդկանց մասին է, որոնք ապրում են այնտեղ եւ ապրելու են», - հայտնել է Պոպովը: