Ապրիլի սկզբին Լեռնային Ղարաբաղի դեմ ադրբեջանական ագրեսիայի արդյունքում ոտքը կորցրած զինծառայող Արման Ավետիսյանն առաջին վիրավորն է, ում ոտքը պրոթեզավորել է հայտնի բժիշկ-օրթոպեդ Մկրտիչ Գինոսյանը: Այսօր նա նորից հանդիպել է բժշկին՝ պրոթեզի կարգավորման համար:

NEWS.am-ի թղթակցի հետ զրույցում Մկրտիչ Գինոսյանը նշեց, որ Արմանի մոտ հիմա ժամանակավոր ուսումնա-մարզական պրոթեզ է, որի օգնությամբ նա կվարժվի պրոթեզին, կսովորի դրանով քայլել: Իսկ հիմնական պրոթեզավորումը կարվի երեք ամիս անց: «Այդ ընթացքում մարդիկ սովորում են ոչ միայն քայլել, այլեւ վազել: Նրանք պրոթեզով սովորում են անել այն ամենը, ինչ մարդն անում է երկու ոտքով»,- վստահեցրեց բժիշկը:

Արմանն ամենայն ճշտության կատարում է բժշկի բոլոր հրահանգները. ինչպես պետք է տեղադրել կամ հանել պրոթեզը, ինչպես քայլել: Ընթացքում բժիշկն ու հիվանդը կատակներ են փոխանակում: Հետո՝ ուղիղ քայլելու եւս մեկ փորձ:

Հետեւելով այս ժպտուն երիտասարդին՝ դժվար է պատկերացնել, թե ինչի միջով է ստիպված եղել անցնել: Պատմում է, որ թշնամու նռնակի պայթյունի հետեւանքով թաթը կորցրել է, երբ փորձում էր կրակի տակից դուրս բերել իր հրամանատարին՝ լեյտենանտ Աշոտ Շահբազյանին:

Երբ օգնությունը տեղ է հասնում, Արմանն արդեն արնաքամ էր լինում, եւ որոշվում է նրան առաջինը դուրս բերել կրակի գոտուց՝ որպես ծանր վիրավորի: Դիրքերից իջեցնելիս Արմանը եւս մեկ բեկորային վիրավորում է ստանում: Հրամանատար Շահբազյանի հետեւից նույն պահին գնալ չեն կարողանում, իսկ հետո արդեն ուշ է լինում:

Արմանին տեղափոխում են մոտակա հոսպիտալ, որտեղ անմիջապես անդամահատում են ոտքը, իսկ հետո տեղափոխում Երեւան՝ կենտրոնական զինվորական հոսպիտալ: Այստեղ նա երկու վիրահատության է ենթարկվում:

Արմանի մայրը՝ Քնարիկը, պատմում է, որ միայնակ մայր է, Արմանը նրա միակ որդին է: Ծնունդով Արարատից են, բայց սեփական տանիքը չունեն, ստիպված են բնակարան վարձել: Երեւանում ժամանակավորապես ապրում են ազգականների մոտ:

Ի դեպ, Արմանը զորակոչվելուց առաջ ընդունվել է Ագրարային համալսարան՝ վճարովի հիմունքով: Այս դեպքից հետո բուհի ղեկավարությունը նրան հնարավորություն է ընձեռել անվճար ուսանել: Բայց դրա համար Արմանը ստիպված կլինի ամեն օր Արարատից Երեւան հասնել, եւ մայրը չի պատկերացնում, թե այս վիճակում որդին ինչպես պետք է մայրաքաղաք հասնի: Իսկ մասնագիտությանմբ վարսահարդար եւ մշտական աշխատանք չունեցող կինը Երեւանում բնակարան վարձել չի կարող:

Ընտանիքին օգնելու ցանկություն ունեցողները կարող են փոխանցում կատարել հետեւյալ հաշվեհամարներին.

ՎՏԲ-Հայաստան բանկ

Քնարիկ Ավետիսյան

Հեռ. - 093-59-05-56, 077-33-90-97

16041036918700 AMD

16041036918702 EUR

16041036918703 RUR

16041036918701 USD