Երեւանի Շենգավիթ վարչական շրջանի դատարանը վարույթ չի ընդունել Մերի Մարգարյանի եւ նորածնի մահվան գործը մեղադրյալներից մեկի մասով:
«Դատալեքս» դատական տեղեկատվական համակարգից NEWS.am-ը տեղեկացավ, որ մեղադրյալ, «Շենգավիթ» ԲԿ-ի մյուս գինեկոլոգ - մանկաբարձ Անի Բաբելյանի մասով գործը հետ է ուղարկվել մեղադրողին:
Անի Բաբելյանի փաստաբան Կարեն Սարդարյանը NEWS.am-ի հետ զրուցում ասաց, որ իրենք տեղյակ չեն՝ մեղադրական եզրակացությունում ինչը չի համապատսպանում օրենքի պահանջներին, որ գործը հետ է ուղարկվել:
Նշենք, որ ըստ մեղադրական եզրակացության՝ «Շենգավիթ» ԲԿ-ի գինեկոլոգ- մանկաբարձ Անի Բաբելյանը 2015թ. հուլիսի 25-ին բժշկական օգնությունը եւ սպասարկումը կազմակերպելու ժամանակ պարտավոր է եղել Մերի Մարգարյանին ցուցաբերել անհետաձգելի, առաջին բժշկական օգնություն` անկախ այդ օգնության դիմաց վարձատրությունը երաշխավորող հիմքերի եւ այլ հանգամանքների առկայությունից, ինչպես նաեւ ապահովել ցուցաբերվող բժշկական օգնության եւ սպասարկման քանակական եւ որակական բնութագրիչների համապատասխանությունը սահմանված չափանիշներին, իր մասնագիտական պարտականությունների նկատմամբ անփույթ եւ անբարեխիղճ վերաբերմունքի հետեւանքով դրանք իրականացրել է ոչ պատշաճ, որն անզգուշությամբ առաջացրել է բուժվող հիվանդի` Մերի Մարգարյանի, այնուհետեւ` նորածնի մահը:
Նշենք, որ գործով մյուս մեղադրյալը ՝ «Շենգավիթ» ԲԿ-ի մանկաբարձ- գինեկոլոգ Շուշանիկ Բախշյանն է: Ըստ մեղադրական եզրակացության՝ նա, հանդիսանալով բժշկական օգնություն եւ սպասարկում իրականացնող անձ, 2015թ. փետրվարի 11-ից հաշվառման է վերցրել եւ վարել Մերի Վաղինակի Մարգարյանի հղիությունը: Բժշկական օգնությունը եւ սպասարկումը կազմակերպելու ժամանակ, «Բնակչության բժշկական օգնության եւ սպասարկման մասին» ՀՀ օրենքի 19-րդ հոդվածի համաձայն` պարտավոր լինելով Մերի Մարգարյանին ցուցաբերել անհետաձգելի, առաջին բժշկական օգնություն` անկախ այդ օգնության դիմաց վարձատրությունը երաշխավորող հիմքերի եւ այլ հանգամանքների առկայությունից, ինչպես նաեւ ապահովել ցուցաբերվող բժշկական օգնության եւ սպասարկման քանակական եւ որակական բնութագրիչների համապատասխանությունը սահմանված չափանիշներին, իր մասնագիտական պարտականությունների նկատմամբ անփույթ եւ անբարեխիղճ վերաբերմունքի հետեւանքով դրանք իրականացրել է ոչ պատշաճ, որն անզգուշությամբ առաջացրել է բուժվող հիվանդի` Մերի Մարգարյանի, այնուհետեւ` նորածնի մահը:
Բախշյանին եւ Բաբելյանին մեղադրանք է առաջադրվել Քրեական օրենսգրքի 130-րդ հոդվածի 2-րդ մասով: Բախշյանը գրավի դիմաց ազատ է արձակվել, իսկ Բաբելյանին նկատմամբ խափանման միջոց է ընտրվել ստորագրություն չհեռանալու մասին:
Գործը քննվում է Շենգավիթ վարչական շրջանի ընդհանուր իրավասության դատարանում: