Բաքվում հայտնաբերված վարորդական վկայականն ամենայն հավանականությամբ պատկանում է քառօրյա պատերազմին զոհված փոխգնդապետ Ալեքսան Առաքելյանին:
«Բոլոր տվյալները համընկնում են: Բացի վկայականից, նաեւ Ալիկիս բոլոր փաստաթղթերը, ժամացույցը, գումարը, ավտոյի բանալիները ադրբեջանցիները վերցրել էին»,- NEWS.am-ի թղթակցին ասաց զոհված փոխգնդապետի հայրը՝ Գեւորգ Առաքելյանը:
Նշենք, որ ըստ ադրբեջանական Minval.az–ի՝ փաստաթուղթը գտել են Բաքվի Սաբունչինի շրջանում։ Oxu.Az–ի փոխանցմամբ՝ իրավապահ մարմինները հայտնել են, որ Բաքիխանով ավանի Մեհմանդարովի փողոցի համար 8 տան բնակիչ Իլքին Մամեդովն իր տան առջեւ գտել է հային պատկանող փաստաթուղթ, որը փոխանցել է Սաբունչինի շրջանի ոստիկանական վարչության 13-րդ բաժանմունք։ Վարորդական վկայականը BC կարգի է, համարը՝ «RG 052597»։
Թե ինչպես է զոհված փոխգնդապետի վարորդական վկայականը հայտնվել Մամեդովի տան առջեւ, դեռեւս պարզ չէ:
Հիշեցնենք, որ Ալեքսան Առաքելյանն իր 5 զինակից ընկերների հետ զոհվել էր ապրիլի 1-ի լույս 2-ի գիշերը թեժ կռվի ժամանակ: Փոխգնդապետն իր ընկերների հետ դիրքեր էր մեկնել, երբ իմացել էր հակառակորդի հարձակման մասին, սակայն դիրքերում շրջափակվել էր նրանց մեքենան:
Առաքելյանի եւ հարազատների միջեւ կապն ընդհատվել էր ապրիլի 2-ից: Ապրիլ 10-ին միայն հարազատներն իմացան փոխգնդապետի զոհվելու մասին, երբ հայկական կողմին էր հանձնվել ապրիլի 2-ից 5-ը ծավալված ռազմական գործողությունների արդյունքում անհետ կորած 18 զինծառայողների մարմինները: