ՀՀ Քաղավիացիայի գլխավոր վարչության նախկին պետ Շահեն Պետրոսյանը կարծում է՝ Հայաստանի Քաղաքացիական ավիացիայի գլխավոր վարչության պետ Արտյոմ Մովսեսյանին պաշտոնից ազատելը ոչինչ չի փոխի:
«Արտյոմ Մովսիսյանը նստել վայելել է: Մարդ փոխելը ոչինչ չի փոխում: Համակարգն է անհրաժեշտ փոխել: Պետք է նորմալ ընտրություն լինի, երկրում լեգիտիմ իշխանություն լինի, լեգիտիմ իշխանությունը կարողանա ճիշտ մարդուն այնտեղ նշանակել: Հետո մի մարդով գարուն չի գա, եթե վերեւից փտած է համակարգը»,- NEWS.am-ի հետ զրույցում ասաց Շահեն Պետրոսյանը:
Նրա խոսքով՝ Հայաստանն այժմ հայտնվել է երրորդական կարգի երկրների ցանկում, որը սեփական ավիափոխադրող չունի եւ շուկան 90 տոկոսով ռուսական ընկերությունների ձեռքում է: «Բաց երկնքի քաղաքականության շնորհիվ ռուսական ընկերություններն ամբողջ շահույթը վերցնում են, որ մենք կարող էինք ունենալ: Մենք չունենք փոխադրող, ինչը խոսում է երկրի հեղինակության մասին: Բաց երկնքի քաղաքականությունը ենթադրում է միջպետական համաձայնագրեր, բայց մենք չունենք: Մեզ մոտ այս ամենը միակողմանի է, ինչը կոռուպցիոն գործարքի հետեւանք է: Ամեն ինչ տրված է ռուսական ընկերություններին, մեր օլիգարխներն էլ ռուսական օլիգարխիայի դիստրիբյուտորներն են»,- ասաց Շահեն Պետրոսյանը:
Նա նշեց, որ Հայաստանն ազգային ավիափոխադրող չունի, քանի որ դրա ցանկությունը չկա իշխանության կողմից: Իսկ գործող ավիափոխադրումների բարձր գներն էլ, ըստ նրա, պայմանավորված են վառելիքի եւ ծառայությունների գներով, որոնց երկուսի դեպքում էլ մենաշնորհ է գործում:
Նշենք, որ քաղաքացիական ավիացիայի գլխավոր վարչության պետ է նշանակվել Սերգեյ Ավետիսյանը, որը մինչ այդ զբաղեցրել է ՀՀ էկոնոմիկայի նախարարի տեղակալի պաշտոնը:
