Ամերիաբանկի Տնօրենների խորհրդի անդամ, դոկտոր Նուբար Աֆեյանն ընտրվել է Մասաչուսեթսի տեխնոլոգիական ինստիտուտի հոգաբարձուների խորհրդի անդամ: Մասաչուսեթսի տեխնոլոգիական ինստիտուտն աշխարհի առաջատար համալսարաններից է եւ ըստ համալսարանների համաշխարհային ակադեմիական վարկանշավորման տվյալների՝ զբաղեցնում է 3-րդ տեղը:
Նուբար Աֆեյանն Ամերիաբանկի խորհրդի անդամ է 2010թ. հուլիսի 6-ից: Կենսատեխնիկական գիտությունների դոկտորի աստիճանն ստացել է Մասաչուսեթսի տեխնոլոգիական ինստիտուտում: Նա բազմաթիվ գիտական հոդվածների եւ արտոնագրերի հեղինակ է: Նուբար Աֆեյանը Flagship Ventures ընկերության հիմնադիրը եւ գործադիր տնօրենն է: Ընկերությունը ներդրումներ է կատարում կենսաբանական/բարձր տեխնոլոգիական ուղղվածություն ունեցող սկսնակ ձեռնարկություններում: Ներկայումս ընկերության պորտֆելի արժեքը կազմում է 1.4 մլրդ ԱՄՆ դոլար: Իր 30 տարվա կարիերայի ընթացքում Նուբար Աֆեյանը մասնակցել է կենսաբանական/բարձր տեխնոլոգիական ուղղվածություն ունեցող 38-ից ավել հաջողակ ընկերությունների հիմնադրմանը: Ներկայումս հանդիսանում է մի շարք պետական եւ մասնավոր կազմակերպությունների տնօրենը կամ խորհրդի նախագահը:
Նուբար Աֆեյանը մասնակցել է նաեւ Հայաստանի ազգային մրցունակության հիմնադրամի, Դիլիջանի միջազգային դպրոցի, «Նուբար եւ Աննա Աֆեյաններ հիմնադրամի» ստեղծմանը, ինչպես նաեւ «Ավրորա մրցանակ հանուն մարդասիրաց» նախաձեռնությանը: Նա նաեւ հանդիսացել է Համաշխարհային տնտեսական համաժողովի Համաշխարհային օրակարգի խորհրդի (Global Agenda Council) քիմիական արդյունաբերության եւ բիոտեխնոլոգիաների խմբի եւ վերջինիս կից Զարգացող տեխնոլոգիաների խորհրդի նախագահը: 2000 թ-ից Նուբար Աֆեյանը դասավանդում է Մասաչուսեթսի տեխնոլոգիական ինստիտուտի Սլոունի մենեջմենթի դպրոցում (MIT Sloan School of Management)՝ որպես ավագ դասախոս:
