Վանաձորի քաղաքապետի ընտրություններին Հայաստանի հանրապետական կուսակցության թեկնածուն ՀՀ նոտարական պալատի նախկին նախագահ, Վանաձորի նոտար Մամիկոն Ասլանյանն է: Այս մասին այսօր՝ հունիսի 21-ին, կուսակցության Լոռու տարածքային կազմակերպության խորհրդի նիստին որոշումը կայացնելուց հետո լրագրողներին ասաց ՀՀԿ տարածքային կազմակերպության մամուլի պատասխանատու Վահե Դոխոյանը:
«Խորհուրդը որոշում կայացրեց, որ առաջիկա ՏԻՄ ընտրություններում մեր կուսակցության կողմից ներկայացրած ցուցակը կգլխավորի Մամիկոն Ասլանյանը»,- ասաց Վահե Դոխոյանը՝ դժվարանալով պատասխանել՝ ինչու ընտրվեց Մամիկոն Ասլանյանի թեկնածությունը:
Վահե Դոխոյանը նշեց, որ միայն Մամիկոն Ասլանյանի թեկնածությունը չի քննարկվել:
«Կատարվել է ուսումնասիրություն, տեղի են ունեցել սոցիալական հարցումներ, հաշվի է առնվել ժողովրդի կարծիքը, հարցումների ընթացքում շոշափվել են շրջանառվող թեկնածուների անունները՝ հասկանալու, թե ում է հավակնում ընտրել ժողովուրդը»,- ասաց նա:
