ԱՄՆ պետքարտուղարի օգնական Վիկտորիա Նուլանդը Կիեւ կայցելի, այնուհետեւ կմեկնի Մոսկվա, որտեղ կքննարկի Մինսկի համաձայնությունների իրականացման ընթացքը: Այս մասին հաղորդել է պետքարտուղարությունը:
Գերատեսչության տվյալներով, Կիեւում Նուլանդը կհանդիպի Ուկրաինայի կառավարության պաշտոնատար անձանց հետ, կքննարկի «երկկողմ եւ տարածաշրջանային հարցեր՝ ներառյալ Ուկրաինայում բարեփոխումների առաջնահերթություններն ու Մինսկի համաձայնությունների իրականացման ընթացքը»:
«Այնուհետեւ նա կմեկնի Մոսկվա, որտեղ հանդիպումներ կունենա Ռուսաստանի կառավարության պաշտոնատար անձանց հետ՝ քննարկելու Ուկրաինայի արեւելքում տիրող իրադրությունն ու Մինսկի համաձայնությունների իրականացման ընթացքը»,- ասված է հաղորդագրությունում:
Ըստ ՌԻԱ Նովոստիի, ՌԴ նախագահի մամուլի քարտուղար Դմիտրի Պեսկովը, սակայն, հայտարարել է, որ Վլադիմիր Պուտինի ժամանակացույցում ԱՄՆ պետքարտուղարի օգնական Վիկտորիա Նուլանդի հետ հանդիպում նախանշված չէ:
