Սիրիայում իրավիճակի կարգավորելու համար պետք է ահաբեկիչների ու սպաառազինման ապօրինի մատակարարումների համար փակել թուրք-սիրիական սաահմանը: Այս մասին հայտնել է ՌԴ ԱԳՆ պաշտոնական ներկայացուցիչ Մարիա Զախարովան, փոխանցում է «ՌԻԱ Նովոստին»:
«Թուրքիայի ու Սիրիայի սահմանը մնում է մշտական լարվածության աղբյուր՝ թուրքական կողմից գրոհայինների շարունակվող ներթափանցման, Սիրիայում գործող ահաբեկչական խմբավորումների համար զենքի ու զինամթերքի մատակարարումների պատճառով: Սիրիայում իրավիճակի կարգավորման համար պետք է փակել թուրք-սիրիական սահմանը սպառազինումների բոլոր ապօրինի մատակարարումների, ահաբեկիչների շարքերը համալրող զինյալների տեղաշարժի համար՝ ճիշտ այնպես, ինչպես արձանագրված է ՄԱԿ-ի ԱԽ-ի 2170, 2178, 2258 բանաձեւերում»,- ասել է նա հունիսի 23-ին ճեպազրույցի ընթացքում:
Մոսկվայում նշում են, որ Սիրիայում իրավիճակն այսօրվա դրությամբ մնում է «բարդ ու ծայրաստիճան անբարենպաստ», հավելել է նա:
«Ցավոք, նույնիսկ մուսուլմանների համար սրբազան ամսին՝ Ռամադանին բռնության ինտենսիվությունը ամբողջովին չվերացավ: Շարունակվում է սիրիական բանակի ու ժողովրդական աշխարհազորի դիմակայությունը ահաբեկչական խմբավորումներին: Առավել ակտիվ են բախումները Մանբիջ բնակավայրի մոտ, որտեղ ԻՊ զինյալները փորձում են ճեղքել շրջափակումը»,- արձանագրել է ՌԴ ԱԳՆ ներկայացուցիչը: