ԵՄ կազմից Մեծ Բրիտանիայի դուրս գալու որոշումը նշանավորեց եվրոպական երազանքի ավարտը, գրում է The Independent–ը։
Պարբերականը հիշեցնում է Առաջին համաշխարհային պատերազմի նախօրեին Մեծ Բրիտանիայի արտգործնախարար Էդվարդ Գրեյի բառերը. «Ամբողջ Եվրոպայում մարում են կրակները»։ Հետեւելով հանրաքվեի արդյունքներին՝ հեղինակը գալիս է այն եզրակացության, որ այդ բառերը լավագույնս նկարագրում են աշխարհամասում իրավիճակը։
Տեսաբանը խոստովանում է, որ եվրոպական նախագիծն իր 60-ամյա պատմության մեջ կրեց ամենանվաստացուցիչ եւ ջախջախիչ պարտությունը։ ԵՄ ոչ մի անդամ պետություն նախկինում չէր լքել բլոկը։ Իսկ այստեղ խոսքն այնպիսի մեծ պետության մասին է, ինչպիսին Մեծ Բրիտանիան է, որտեղ ապրում է ԵՄ բնակչության 10 տոկոսը, եւ որին բաժին է ընկնում ԵՄ ՀՆԱ 1/5-ը։
Հեղինակը կանխատեսում է, որ Բրիտանիան եւ նրա եվրոպական հարեւանները դառը վեճերի եւ նախատինքների փուլ են մտնում այնպիսի ժամանակահատվածում, երբ Արեւմուտքը տնտեսության եւ անվտանգության լուրջ խնդիրներ ունի։ Դրանց արդյունքում Բրիտանիան եւ Եվրոպան կթուլանան։
Brexit–ից հետո մյուս եվրոպական պետությունները կսկսեն պնդել, թե ԵՄ–ն ն կարող է ապրել եւ ծաղկել առանց Մեծ Բրիտանիայի։ Սակայն հանրաքվեն հավանաբար շղթայական ռեակցիա կբերի մյուս երկերում՝ Շվեդիայում, Դանիայում, Նիդեռլանդներում եւ անգամ Ֆրանսիայում։
Նիդեռլանդական «Ազատության կուսակցության» առաջնորդ Գերթ Վիլդերսն արդեն կոչ է անում հանրաքվե անցկացնել իր երկրում։ Ֆրանսիական «Ազգային ճակատի» առաջնորդ Մարին Լե Պենը Թվիթերում գրել է հաղթանակի մասին։
Հեղինակը նշում է, որ ինքը համաձայն է Մեծ Բրիտանիայի «Անկախության կուսակցության» ղեկավար Նայջլ Ֆարաջի հետ, որ Brexit–ը կարող է դառնալ եվրոպական նախագծի փլուզման սկիզբը։