Հունիսի 23-ին Մեծ Բրիտանիայում ընթացած հանրաքվեի արդյունքները, որի համաձայն բրիտանացիների մեծամասնությունը քվեարկել է երկրի` ԵՄ-ից դուրս գալու օգտին, Դանիայի եւ Եվրոպայի համար տխուր են: Այդ մասին հայտնել է Դանիայի վարչապետ Լյոկկե Ռասմուսենը, հայտնում է «ՌԻԱ Նովոստին»:
Հինգշաբթի Մեծ Բրիտանիայում հանրաքվե է տեղի ունեցել Եվրամիությանը երկրի անդամակցության վերաբերյալ: Պաշտոնական տվյալների համաձայն, Brexit-ի օգտին է քվեարկել 51,9 տոկոսը:
«Մենք պետք է հարգենք Մեծ Բրիտանիայի բնակչության մեծամասնության կատարած ընտրությունը: Ես չեմ թաքցնի նաեւ այն փաստը, որ կարծում եմ, որ դա Եվրոպայի եւ Դանիայի համար տխուր արդյունք է: Այժմ բրիտանական կառավարությունը պետք է որոշի Մեծ Բրիտանիայի հետագա ուղին: Ես հույս ունեմ, որ Մեծ Բրիտանիան կշարունակի սերտ հարաբերություններ պահպանել ԵՄ-ի հետ», — ասել է Դանիայի վարչապետը, որի խոսքերն են մեջբերվում մամուլի համար հաղորդագրություններում:
Նրա խոսքով, բրիտանական հանրաքվեի արդյունքները չեն փոխում այն փաստը, որ Դանիան մնում է Եվրամիության անդամ, որը Դանիայի համար մնում է աշխարհի վրա ազդելու լավագույն հնարավորությունը:
Ռասմուսենը նշել է, որ բրիտանական, ինչպես նաեւ նախկինում Նիդերլանդներում եւ Դանիայում անցկացված հանրաքվեները մտորման առիթ են տալիս, որովհետեւ, նրա խոսքով, բնակչության շրջանում թերահավատություն կա ԵՄ-ի հանդեպ: Այդ պատճառով ԵՄ-ի անդամ երկրները պետք է ուշադրություն դարձնեն այն հարցերին, որոնք հուզում են բնակչությանը, կարծում է Դանիայի վարչապետը:
