Հռոմի Պապ Ֆրանցիսկոսի ավտոշարասյունը «Զվարթնոց» օդանավակայանից մեկնել է Մայր Աթոռ Սուրբ Էջմիածին։ Տասնյակ մարդիկ են հավաքված օդանավակայանում, որոնք բացականչում են. «Viva Papa»: Շարասյունը շատ դանդաղ է առաջ շարժվում: Մարդիկ մոտենում են պոնտիֆիկոսին, համբուրում ու սեղմում նրա ձեռքը: Մայր Աթոռ Սուրբ Էջմիածին կկայանա Պոնտիֆիկոսի ողջույնի արարողությունը։
Ինչպես ավելի վաղ հայտնել էինք, օդանավակայանում՝ ինքնաթիռի մոտ, Հռոմի Պապին դիմավորել են Հայաստանի Հանրապետության նախագահ Սերժ Սարգսյանն իր տիկնոջ՝ Ռիտա Սարգսյանի հետ։
Հռոմի Պապի այցը շատ հագեցած է լինելու. նա Հայաստանում կմնա մինչեւ հունիսի 26-ը: Այցի առաջին օրը Պապը կայցելի Էջմիածնի Մայր տաճար, որտեղ կաղոթի ու իր ողջույնի խոսքը կուղղի Ամենայն հայոց կաթողիկոս Գարեգին Բ-ին: Այդ օրը Երեկոյան Հռոմի պապ Ֆրանցիսկոսը կհանդիպի Հայաստանի նախագահի ու դիվանագիտական կորպուսի ներկայացուցիչների հետ:
Հունիսի 25-ին Հռոմի պապը կայցելի Ծիծեռնակաբերդ՝ Հայոց ցեղասպանության զոհերի հուշահամալիր եւ թանգարան: Այս հուշահամալիրում 2001-ին աղոթել էր նաեւ Հովհաննես Պողոս երկրորդ պապը: Այնուհետեւ նա կայցելի Գյումրի եւ Սուրբ եւ Անմահ Պատարագ կմատուցի Վարդանանց հրապարակում: Նույն օրը երեկոյան Երեւանում՝ Հանրապետության հրապարակում, տեղի կունենա էկումենիկ արարողություն եւ Խաղաղության Աղոթք:
Հունիսի 26-ին Էջմիածնում Ֆրանցիսկոս պապը կհանդիպի եպիսկոպոսների հետ ու ներկա կգտնի Մայր տաճարում պատարագին, որը մատուցելու է Ամենայն հայոց կաթողիկոս Գարեգին Բ-ն: Ակնկալվում է նաեւ համատեղ հռչակագրի ստորագրում:
Կիրակի երեկոյան Հռոմի պապը կաթողի Խոր Վիրապի եկեղեցում, որտեղ բանտարկված է եղել սուրբ Գրիգոր Լուսավորիչը: