ՀՀ Վճռաբեկ դատարանի վճռով, այսօր՝ հունիսի 24-ին, մասնակիորեն բավարարվել է 2013 թ. հունվարի 3-ին Արաբկիր բժշկական կենտրոնում մահացած երկու տարեկան, երեք ամսական Լիա Միսակյանի գործով տուժողի իրավահաջորդի ներկայացուցիչ, Հելսինկյան Քաղաքացիական Ասամբլեայի Վանաձորի գրասենյակի նախագահ Արթուր Սաքունցի կողմից ներկայացված վճռաբեկ բողոքը:
ՀՔԱՎ գրասենյակից NEWS.am-ին հայտնում են, որ վճռաբեկ բողոքով պահանջվել էր բեկանել ՀՀ Վերաքննիչ քրեական դատարանի՝ 2015 թ. դեկտեմբերի 22-ի դատական ակտը, փոփոխել Լիլիթ Վարդանյանի եւ Զարինե Այվազյանի նկատմամբ նշանակված ազատազրկման ձեւով պատիժը, ինչպես նաեւ վերջիններիս նկատմամբ նշանակել լրացուցիչ պատիժ՝ նրանց զրկելով որոշակի գործունեությամբ զբաղվելու իրավունքից՝ համապատասխանաբար երեք տարի եւ երկու տարի ժամկետով:
Բողոքը բավարարվել է միայն վերջին մասով. Վճռաբեկ դատարանի որոշմամբ Արաբկիր եւ Քանաքեռ-Զեյթուն վարչական շրջանների ընդհանուր իրավասության դատարանը լրացուցիչ պատիժ նշանակելու մասով կիրականացնի նոր քննություն: