Մոտակա ամսվա ընթացքում բոլոր հաշվիչները, որոնք սխալ են հաշվում գիշերային եւ ցերեկային սակագները, կստուգվեն եւ կշտկվեն: Այդ մասին հունիսի 24-ին լրագրողների հետ զրույցում հայտնել է Հայաստանի Էլեկտրացանցերի գլխավոր տնօրեն Կարեն Հարությունյանը:
Սակայն, նրա խոսքով, դա չի օգնի ապագայում ամբողջությամբ բացառել նման խնդիրները, որովհետեւ ժամկետանց հաշվիչները շտկումից հետո էլ կարող են սխալ աշխատել:
Կարեն Հարությունյանը նաեւ հավելել է, որ իր կարծիքով, գրեթե անհնար է հաշվարկել հաշվիչների անսարքության հետեւանքով սպառողներին հասցված վնասը, որովհետեւ յուրաքանչյուր դեպքում խափանումները տարբեր են եղել. ինչ-որ տեղ հաշվիչներն ավելի կարճ էին հաշվում գիշերային ժամերը, ինչ-որ տեղ դրանք գիշերից առավոտ էին տեղափոխում: Նրա խոսքով, եթե հնարավոր լինի չափել եւ ապացուցել վնասի չափը, այն կփոխհատուցվի: Սակայն առայժմ դա հաջողվել է անել ընդամենը 1 կամ 2 դեպքում:
Հիշեցնենք, որ Հանրային ծառայությունների կարգավորման հանձնաժողովն ընկերությանը տուգանել է հաշվիչների ցերեկայինից գիշերային սակագների անցման գրաֆիկը խախտելու համար: «Էլցանցերի» պնդմամբ, խափանվել է հաշվիչների ծրագրային ապահովումը (խնդիրը կապված է միայն էլեկտրոնայինների հետ, որովհետեւ հին` ինդուկցիոնները միայն ցերեկային սակագնով են հաշվարկում):
Հիշեցնենք նաեւ, որ 2016-ի հոկտեմբերի 1-ից Հայաստանում էլեկտրաէներգիայի սակագները փոխվում են. Հայաստանի Հանրային ծառայությունները կարգավորող հանձնաժողովի որոշմամբ, էլեկտրաէներգիայի սակագները նվազում են 2,58 դրամով: Սակայն շատ մասնագետներ եւ հանրային կազմակերպությունների ներկայացուցիչներ պնդում են, որ էլեկտրաէներգիայի սակագները պետք է նվազեին գոնե 7–10 դրամով: