Սոցիալական կայքերում լուսանկար տեղադրելիս մենք ընտրում ենք այն նկարը, որով կարելի է տեսնել մեր էության կարեւոր գծերը՝ եռանդուն, ընկերասեր, ջերմ։ Այդուհանդերձ վերջին հետազոտությունները ցույց են տալիս, որ մարդիկ, որոնք տեսնում են մեր լուսանկարները, հավանաբար այդքան էլ ճիշտ չեն գնահատում մեր անհատականությունը։ Նոր հետազոտությունը ցույց է տալիս, որ կարճատեւ տեսահոլովակը կարող է շատ ավելի ճշգրիտ տպավորություն թողնել, փոխանցում է Planet- today–ը։
University of Texas at Austin–ի հետազոտողները մոտ 200 տղամարդկանց եւ կանանց շրջանում ուսումնասիրություն են անցկացրել։ Նրանք վերցրել են մասնակիցների լուսանկարները, որոնք կան ինտերնետ կայքերում եւ կարճ տեսահոլովակներ են նկարահանել այդ անձանց մասին, որպեսզի տեսնեն, թե ինչ առաջին տպավորություն է ձեւավորվելու մարդկանց մոտ։ Հետազոտությունները ցույց են տվել, որ մարդիկ համաձայնել են հանդիպել այն անծանոթի հետ, որի մասին տեսահոլովակը տեսել են։ Իսկ եթե տեսել են միայն լուսանկարը, ավելի քննադատաբար են մոտեցել մարդուն։
Բանն այն է, որ մենք թերագնահատում ենք լուսանկարները, քանի որ դրանցում սահմանափակ տեղեկություն է պարունակվում։ Իսկ տեսահոլովակը դինամիկ մանրամասներ է պատմում, որոնք գրավում են մեր ուշադրությունը եւ արագ բացահայտում մարդու մասին տեղեկությունը, անգամ եթե այն տեւում է մի քանի վայրկյան։ Ձայնը, ժպիտը, ժեստերը բավական են մարդու մասին պատկերացում կազմելու համար։