Թուրքիայի փոխվարչապետ Մեհմետ Շիմշեկը հայտնել է, որ բրիտանացիները, քվեարկելով ԵՄ կազմից երկրի դուրս գալու օգտին, բացել են Պանդորայի արկղը, հայտնում է «ՌԻԱ Նովոստին»:
«Դուք չեք ուզում բացել Պանդորայի արկղը, բայց այն արդեն բացվել է»,- գրել է Շիմշեկը իր Twitter-յան էջում:
Հանրաքվեին արդյունքներին արձագանքել է նաեւ Թուրքիայի վարչապետի տեղակալ Նուրեթթին Ջանըքլըն: «Սկսվել է ԵՄ փլուզման գործընթացը: Խորտակվող նավից առաջինը Մեծ Բրիտանիան փախավ»,- գրել է նա Twitter–ում:
Հունիսի 23-ին Մեծ Բրիտանիայում կայացել է ԵՄ-ին երկրի անդամակցության վերաբերյալ հանրաքվե: Ըստ պաշտոնական տվյալների՝ ԵՄ կազմից երկրի դուրս գալուն կողմ է քվեարկել 51.9 տոկոսը:
Ըստ վերջին հարցումների՝ Թուրքիայի բնակչության կեսից քիչն է կողմ ԵՄ-ին երկրի անդամակցությանը, հայտնումէ «Ֆրանս Փրեսը»:
ԵՄ ու Թուրքիայի միջեւ ասոցացման մասին համաձայնագիրը ստորագրվել է 1963-ին: Իսկ անդամակցության հայտ Անկարան ներկայացրել է 1987-ին: Անդամակցության մասին բանակցությունները միայն 2005-ին են սկսվել: Այդ ժամանակվանից ի վեր կողմերը համաձայնեցրել են 35 տեխնիկական կետերից 14-ը, որոնք պետք է կատարի Անկարան, որպեսզի ապահովի ԵՄ անդամակցության համար անհրաժեշտ չափորոշիչները: Արգելափակված է մնում 17 կետ, որոնցից չորսի վերաբերյալ հիմա բանակցում են:
ԵՄ-ին Թուրքիայի անդամակցության վերաբերյալ բանակցությունները բազմիցս բարդացել են տարաձայնություններով, որոնց հետեւանքով դրանք դադարել են: Գլխավոր խոչընդոտը մնում է Թուրքիայի դիրքորոշումը Կիպրոսի հարցում: Թուրքիայի ու ԵՄ միջեւ վիզաների չեղարկման ճանապարհին կարեւոր փուլ էր 2013-ի դեկտեմբերին ռեադմիսիայի ( այլ երկրներից արտաքսված քաղաքացիների ընդունման վերաբերյալ պետության համաձայնություն) մասին պայմանագրի ստորագրումը:
