ԱՄՆ-ն հարգում է Մեծ Բրիտանիայի ժողովրդի որոշումը՝ ԵՄ կազմից դուրս գալու վերաբերյալ: Այս մասին հունիսի 24-ին հայտնել է նախագահ Բարաք Օբաման, փոխանցում է «ՌԻԱ Նովոստին»:
Նա շեշտել է, որ ԱՄՆ-ի ու Մեծ Բրիտանիայի միջեւ «հատուկ հարաբերությունները շարունակվում են»: Նրա խոսքով «ՆԱՏՕ-ին Մեծ Բրիտանիայի անդամակցությունը մնում է կենսական կարեւորության գործոն ԱՄՆ-ի արտաքին քաղաքականության, անվտանգության ու տնտեսության համար»: Նույնը նրա խոսքով վերաբերում է նաեւ Վաշինգթոնի ու ԵՄ-ի հարաբերություններին, որոնք թույլ են տվել «մեծ արդյունքների հասնել կայունության ապահովման, տնտեսական աճի խթանման ու ժողովրդավարական արժեքներն ու իդեալներն առաջ մղելու գործում՝ թե մայրցամաքում, թե դրա սահմաններից դուրս»:
Հունիսի 23-ին Մեծ Բրիտանիայում կայացել է ԵՄ-ին երկրի անդամակցության հարցեվ հանրաքվեն: Ըստ պաշտոնական տվյալների, որոնք հրապարակվել են հունիսի 24-ին, ԵՄ-ից երկրի դուրս գալուն կողմ է քվեարկել 51.9 տոկոսը:
