Երեւանի Շենգավիթ վարչական շրջանի ընդհանուր իրավասության դատարանի նախագահ Դավիթ Բալայանը միայն այս տարի 4 գործ է հետ ուղարկել մեղադրողին՝ շտկումներ անելու համար: Այս մասին NEWS.am-ի թղթակցին ասաց Դատական դեպարտամենտի մամուլի խոսնակ Արման Խաչատրյանը՝ անդրադառնալով NEWS.am-ի հրապարակմանը, թե Մերի Մարգարյանի եւ նորածնի մահվան գործով դատավորն ու դատախազը տուն- տունիկ են խաղում:
«Այդ չորս գործերն էլ շտկված հետ են ուղարկվել: Թե ինչու այս գործը չշտկված հետ բերվում, չեմ կարող մեկնաբանել, բայց դատավորն օրենքով սահմանված կարգով իր գործն է արել: Երեկ երեկոյան՝ աշխատանքային օրվա ավարտին, գործը շտկված մուտք է արվել դատարան»,- ասաց Արման Խաչատրյանը:
Նշենք, որ Մերի Մարգարյանի գործը 4 անգամ դատավոր Դավիթ Բալայանն ուղարկել էր դատախազ Ալիկ Աբրահամյանին՝ տեխնիկական վրիպակները շտկելու համար: Ըստ մամուլի հրապարակումների՝ դատավորը կոնֆլիկտի մեջ է Ալիկ Աբրահամյանի հոր հետ, դա է պատճառը, որ այս գործն արդեն 1 ամսից ավելի է՝ դատարանից դատախազություն է գնում եւ հետ գալիս: Տպավորություն է, որ դատավորն ու դատախազը «մոռացել» են իրենց պարտականությունների մասին եւ առաջնորդվում են միայն ամբիցիաներով:
Ըստ մեղադրական եզրակացության՝ «Շենգավիթ» ԲԿ-ի մանկաբարձ-գինեկոլոգ Շուշանիկ Բախշյանը 2015թ. փետրվարի 11-ից հաշվառման է վերցրել եւ վարել Մերի Վաղինակի Մարգարյանի հղիությունը: Բախշյանը, պարտավոր լինելով Մերի Մարգարյանին ցուցաբերել անհետաձգելի, առաջին բժշկական օգնություն` անկախ այդ օգնության դիմաց վարձատրությունը երաշխավորող հիմքերի եւ այլ հանգամանքների առկայությունից, ինչպես նաեւ ապահովել ցուցաբերվող բժշկական օգնության եւ սպասարկման քանակական եւ որակական բնութագրիչների համապատասխանությունը սահմանված չափանիշներին, իր մասնագիտական պարտականությունների նկատմամբ անփույթ եւ անբարեխիղճ վերաբերմունքի հետեւանքով դրանք իրականացրել է ոչ պատշաճ, ինչն անզգուշությամբ առաջացրել է Մերի Մարգարյանի, այնուհետեւ` նորածնի մահը:
Նույն բժշկական կենտրոնի բժշկուհի Անի Բաբելյանը 2015թ. հուլիսի 25-ին բժշկական օգնությունը եւ սպասարկումը կազմակերպելու ժամանակ, իր մասնագիտական պարտականությունների նկատմամբ անփույթ եւ անբարեխիղճ վերաբերմունքի հետեւանքով դրանք իրականացրել է ոչ պատշաճ, որն անզգուշությամբ առաջացրել է Մերի Մարգարյանի, այնուհետեւ` նորածնի մահը:
Բախշյանին եւ Բաբելյանին մեղադրանք է առաջադրվել Քրեական օրենսգրքի 130-րդ հոդվածի 2-րդ մասով: Բախշյանը գրավի դիմաց ազատ է արձակվել, իսկ Բաբելյանին նկատմամբ խափանման միջոց է ընտրվել ստորագրություն չհեռանալու մասին:
