Ղարաբաղյան կարգավորման վերաբերյալ Հայաստանի եւ Ադրբեջանի նախագահների բանակցությունները պետք է գաղտնի լինեն, «Ամերիկայի ձայնին» հարցազրույցում հայտնել է ԵԱՀԿ-ի Մինսկի խմբի ամերիկացի համանախագահ Ջեյմս Ուորլիքը:
«Նախագահների միջեւ բանավեճերը չպետք է հանրային լինեն: Նրանք զրուցում են իրար հետ` ինչ-որ բանի վերաբերյալ համաձայնելով, իսկ ինչ-որ բանի վերաբերյալ` ոչ: Այն ոլորտները, որոնց վերաբերյալ համաձայնություն է ձեռք բերվել, ավելի շատ են, քան այն ոլորտները, որոնց վերաբերյալ պահպանվում են տարաձայնությունները, սակայն, անկասկած, ամեն ինչ պետք է համաձայնեցվի: Սա այն դեպքը չէ, երբ կարելի է մեկ հարց առանձնացնել եւ հայտարարել, թե այդ հարցի վերաբերյալ համաձայնություն է ձեռք բերվել եւ մենք կարող ենք առաջ շարժվել: Մենք խոսում ենք համապարփակ կարգավորման մասին, այնպես որ մեզ անհրաժեշտ է համաձայնության հասնել բոլոր հարցերի վերաբերյալ: Իսկ առայմ համաձայնություն է ձեռք բերվել որոշալի ոլորտներում, մինչդեռ այլ ոլորտներում նման բան չկա», - նշել է Ուորլիքը:
Անդրադառնալով կարգավորման հիմնական սկզբունքներին, ամերիկացի դիվանագետը հիշեցրել է, որ դրանք անփոփոխ են արդեն ավելի քան 20 տարի:
«Բանակցային սեղանին գտնվող առաջարկները չեն մշակվել երեկ կամ մեկ տարի առաջ: Դրանք հիմնված են այնպիսի սկզբունքների եւ տարրերի վրա, որոնք քննարկվել են տարիներ շարունակ եւ նախագահները սկզբունքնորեն համաձայն են այդ սկզբունքներին եւ տարրերին: Սակայն անկասկած մեզ անհրաժեշտ է դա փորձել, ճշտել, թե դա ինչ է նշանակում գործնականում, «հողի վրա», հիմա մենք հենց դրա վրա ենք աշխատում», - հավելել է Ջեյմս Ուորլիքը: