ԵԱՀԿ Մինսկի խմբի համանախագահները Հայաստանին եւ Ադրբեջանին կոչ են անում չխոչընդոտել Լեռնային Ղարաբաղում ԵԱՀԿ գործող նախագահի անձնական ներկայացուցիչ Անջեյ Կասպրշիկի առաքելության ընդլայնմանը: Այս մասին ասված է ՄԽ համանախագահների համատեղ հայտարարության մեջ, որն ուրբաթ տարածել է ԵԱՀԿ մամուլի ծառայությունը:
«Մենք Հայաստանին եւ Ադրբեջանին կոչ ենք անում վերացնել ԵԱՀԿ գործող նախագահի անձնական ներկայացուցիչ Անջեյ Կասպրշիկի առաքելության ընդլայմանն ուղղված բոլոր խոչընդոտները»,- ասված է հայտարարությունում:
Փաստաթղթում նաեւ նշվում է, որ համանախագահները կոչ են անում նպաստել բանակցություններում առաջընթացին եւ հետաքննությունների մեխանիզմների ներդրման շուրջ ԵԱՀԿ-ի առաջարկներին:
Դեսպանները կարծում են, որ կողմերը պետք է հարգեն մայիսի 16-ին Վիեննայի եւ հունիսի 20-ին Սանկտ Պետերբուրգի բանակցություններում ձեռք բերված համաձայնությունները:
