«Հռոմի Ֆրանցիսկոս պապը Երեւանում Հայոց ցեղասպանության մասին ասաց այն, ինչ հարկ համարեց՝ օգտագործելով այդ ողբերգությունը բնորոշող երկու եզրույթները. ե՛ւ Մեծ Եղեռն, ե՛ւ Ցեղասպանություն»: Այս մասին հունիսի 24-ին տեղական եւ արտասահմանյան լրագրողների հետ ճեպազրույցում հայտարարեց Սուրբ Աթոռի գրասենյակի ղեկավար, կարդինալ Ֆեդերիկո Լոմբարդին:
Կարդինալը նշեց, որ իր ելույթում Պապը ոչ միայն օգտագործեց ցեղասպանություն բառը, այլեւ այդ նախադասության ավարտին մեկ նկատառում հավելեց. նա ասաց, որ «այդ ողբերգությունը՝ ցեղասպանությունը, առաջինն էր անցյալ դարի ողբերգական իրադարձությունների թվում, որոնք գաղափարական եւ ռասիստական էին»:
«Դա բնորոշում է ցեղասպանությունը: Գերտերությունները պատասխանատվության չեն ենթարկվել անցյալ դարի այդ սարսափելի իրադարձությունների համար: Պապն իր խոսքում հստակ ասաց, որ Հայոց ցեղասպանությունը 20-րդ դարի առաջին ցեղասպանությունն էր, որին հետեւեցին մի շարք այլ ցեղասպանություններ, մասնավորապես, նացիզմն ու խորհրդային ժամանակաշրջանի հանցագործությունները: «Ցեղասպանություն» բառն ընդհանրական արտացոլում այդ սարսափելի ողբերգության իրողությունը: Մենք երբեք դա չենք ժխտել: Պապը կարծում է, որ ցեղասպանությունն ավելի հագեցախ բառ է: Նա ասում է այն, ինչ հարկ է համարում: Մենք դա թողնում ենք նրա հայեցողությանը»,- ասաց Լոմբարդին:
Ֆեդերիկո Լոմբարդին ձեռնպահ մնաց մեկնաբանել հարցը, արդյո՞ք Պապի խոսքերից հետո չեն վատթարանա Վատիկանի եւ Անկարայի հարաբերությունները:
«Կարող եմ միայն կրկնել Պապի խոսքերը: Կցանկանայի ընդգծել, որ Պապը միշտ խոսում է խաղաղության, հաշտեցման եւ երկխոսության մասին: Հարկավոր է ճիշտ դասեր քաղել անցյալից՝ միեւնույն սխալը չկրկնելու համար»,- եզրափակեց Լոմբարդին: