Շիրակի մարզի Արթիկ քաղաքում հունիսի 24-ին սելավատարերի խցանման հետեւանքով առաջացած հեղեղման հետեւանքով քաղաքին մեծ վնաս է հասցվել: NEWS.am-ի հետ զրույցում Արթիկի քաղաքապետ Արսեն Աբրահամյանը նշեց, որ այս պահին իրավիճակը քաղաքում նորմալ է, հատուկ հանձնաժողովը հաշվում է հասված վնասների չափը:
«Սելավատարերի հունն է կարգավորվում, որպեսզի նման դեպքերից խուսափենք: Վնասվել են տներ, փողոցներ, այս պահին ուսումնասիրություններ ենք կատարում՝ հասկանալու վնասի չափը»:
Արսեն Աբրահամյանը նշեց, որ այսօր Արթիկ է գնալու նաեւ Հայաստանի վարչապետ Հովիկ Արբրահամյանը եւ Տարածքային կառավարման եւ զարգացման նախարար Դավիթ Լոքյանը՝ տեղում ծանոթանալու իրավիճակին:
Հիշեցնենք, որ Արթիկում ջրալցված հատվածներում ջրի մակարդակը հասնում է մոտ 40 սմ-ի: Ջրալցվել է նաեւ Արթիկի թիվ 2 մանկապարտեզը, որտեղից փրկարարները դուրս են բերել 33 հոգու (աշխատակիցներ եւ երեխաներ), վնասվել տներ:
