Սլովակիայի ծայրահեղ աջակողմյան կուսակցությունը ԵՄ կազմում մնալու հարցով հանրաքվե անցկացնելու մասին խնդրագիր է նախաձեռնել։ Երկրի օրենքների համաձայն՝ խնդրագիրը պետք է 350 հազար մարդ ստորագրի, որպեսզի հանրաքվեն կայանա։ Հանրաքվեի արդյունքները պարտադիր ուժ ունեն։
«Մեծ Բրիտանիայի քաղաքացիները որոշել են ազատվել Բրյուսելի բռնապետությունից։ Ժամանակն է, որպեսզի Սլովակիան նույնպես լքի Եվրոպայի այս խորտակվող «Տիտանիկը»,– մեջբերում է Reuters–ը Ժողովրդական կուսակցության հայտարարությունը։
Հիշեցնենք, որ նախօրեին կայացած հանրաքվեի արդյունքում ԵՄ–ից Մեծ Բրիտանիայի դուրս գալու կողմնակիցները հաղթահարել են 16.7 մլն ձայնի շեմը:
Մեծ Բրիտանիայի դուրս կգա Եվրամիությունից՝ այդ միությունում 43 տարվա անդամակցությունից հետո: Բրիտանացիների 51.9 տոկոսը կողմ է քվեարկել ԵՄ-ից Մեծ Բրիտանիայի դուրս գալուն, իսկ դեմ՝ 48.1 տոկոսը: Հյուսիսային Իռլանդիայի եւ Շոտլանդիայի քաղաքացիները կողմ են արտահայտվել ԵՄ կազմում մնալուն։