Հեղեղումների հետ կապված բոլոր հարցերն է քննարկվել վարչապետի հետ եւ ստեղծվել հանձնաժողով վնասը հաշվարկելու նպատակով: Այս մասին NEWS.am-ի հետ զրույցում ասաց Արթիկի քաղաքապետ Արսեն Աբրահամյանը՝ անդրադառնալով վարչապետի՝ Արթիկ կատարած այցին:
«Ստեղծվել է հանձնաժողով, որը արձանագրելու է վնասի չափը եւ որոշելու է այդ ուղղությամբ կատարվելիք աշխատանքները, օրինակ ինչ անել, որ գյուղի հեղեղատարը վերականգնվի»,-ասաց քաղաքապետը:
Նա ասաց, որ նույնիսկ մոտավոր չգիտի՝ որքան վնաս է հասցվել բնակիչներին:
«Տնամերձ հողամասեր, ընտանի կենդանիներ, տներ, բնակիչներ վնասվել են: Վարչապետն ասաց, որ փոխհատուցում կտրամադրեն: Կառավարությունը կորոշի՝ որքան ու երբ: Հանձնարարվեց՝ աշխատանքները կատարել հնարավորինս արագ ու մինչեւ հաջորդ կառավարության նիստ ներկայացնել արդյունքները»:
Արսեն Աբրահամյանը ասաց, որ Արթիկի 200 տարվա պատմության մեջ առաջին անգամ է նման ջրհեղեղ տեղի ունեցել: Առայժմ աշխատանքներ են տանում, որ կրկնվելու դեպքում հետեւանանքներն ավելի մեղմ լինեն:
«Աշխատանքներ են տարվում հեղեղատարը մաքրելու ուղղությամբ: Դա անակնկալ էր բոլորի համար, այս չափերի աղետ երբեւեէ չէր եղել Արթիկի 200-ամյա պատմության մեջ»:
Հիշեցնենք, որ Արթիկ քաղաքում հունիսի 24-ին սելավատարերի խցանման հետեւանքով հեղեղումներ էին տեղի ունեցել, ինչի հետեւանքով քաղաքին մեծ վնաս է հասցվել: Արթիկում ջրալցված հատվածներում ջրի մակարդակը հասնում էր մոտ 40 սմ-ի: Ջրալցվել էր նաեւ Արթիկի թիվ 2 մանկապարտեզը, որտեղից փրկարարները դուրս են բերել 33 հոգու (աշխատակիցներ եւ երեխաներ), վնասվել տներ:
Իրավիճակին ծանոթանալու նպատակով այսօր առավոտյան Արթիկ էին մեկնել Հայաստանի վարչապետ Հովիկ Արբրահամյանը եւ Տարածքային կառավարման նախարար Դավիթ Լոքյանը:
