Վենեսուելայի ընդդիմության առաջնորդները հայտնել են, որ կարողացել են բավարար քանակությամբ ստորագրություններ հավաքել երկրի նախագահ Նիկոլաս Մադուրոյի հրաժարականի վերաբերյալ հանրաքվե հրավիրելու համար:
Երկրի հարյուր հազարավոր բնակիչներ եկել են տեղի ընտրական հանձնաժողովներ, որպեսզի մատնահետքերի եւ փաստաթղթերի օգնությամբ հաստատեն իրենց անձը, հայտնում է BBC-ի ռուսական ծառայությունը:
Ավելի վաղ Վենեսուելայի Ազգային ընտրական խորհուրդը որոշել էր, որ վերջնագիրը ստորագրած 1,3 մլն վենեսուեալացիները պետք է անձամբ գան ընտրական տեղամասեր եւ հաստատեն իրենց ինքնությունը: Դրա համար խորհուրդը նրանց հինգ օր է տվել:
Հանրաքվեի կոորդինատոր Վիսենտե Բելլոյի խոսքով, տրված ձայների քանակը գերազանցել է անհրաժեշտ նվազագույն շեմը:
Վերջնագիրը, որը իշխանություններին է փոխանցվել մայիսի սկզբին, մոտ 2 մլն ձայն է հավաքել, բայց ընտրական խորհուրդը որոշել է, որ դրանցից 600 հազարը հավաստի չէ: Ընդհանուր առմամբ հանրաքվեի կազմակերպիչները պետք է ընտրողների 195 հազար ձայն հավաքեն:
Այժմ Ազգային ընտրական խորհուրդը պետք է հաստատի մատնահետքերը: Դրանից հետո ընդդիմությունը պետք է նոր վերջնագրի համար ստորագրահավաք կազմակերպի: Այս փուլում նրանց անհրաժեշտ կլինի 4 մլն մարդու ձայն ստանալ:
Վենեսուելան այժմ տնտեսական ծանր ճգնաժամ է ապրում: Տնտեսական անարդյունավետ մոդելի պատճառով երկիրը հայտնվել է սննդամթերքի, դեղամիջոցների եւ այլ ապրանքների ներմուծումից կախման մեջ: Նավթի գների անկումը հանգեցրել է նրան, որ երկրում սննդամթերքի եւ դեղամիջոցների պակաս է դիտարկվում: Ընդդիմությունը դրա համար մեղադրում է Մադուրոյի կառավարությանը:
Ինքը` Մադուրոն հայտնել է, որ անհնար է հանրաքվեն այս տարի անցկացնել ժամանակի պակասի պատճառով: