Ռուսաստանի նախագահ Վլադիմիր Պուտինը եւ ՉԺՀ-ի ղեկավար Սի Ցզինպինը քննարկել են ահաբեկչության դեմ պայքարը եւ ԿԺԴՀ-ի միջուկային խնդիրները: Այդ մասին բանակցությունների ավարտին հայտնել է Պուտինը:
«Քննարկել ենք համաշխարհային եւ տարածաշրջանային առավել սուր խնդիրների լուծման հետեւողական գործողությունները, միջազգային ահաբեկչության դեմ պայքարի համատեղ ջանքերը, ԱԽՏ-ում անվտանգության ապահովումը, Կորեական թերակղզու ոչ միջուկային կարգավիճակի ապահովումը»,— ասել է նա:
«Ընդհանուր արտաքին քաղաքական խնդիրների թվում է աջակցությունը սիրիական կարգավորմանը, Հարավ-Չինական ծովում, Կենտրոնական Ասիայում խաղաղության եւ կայունության ապահովումը»,— ռուսաստանյան նախագահին է մեջբերում «ՌԻԱ Նովոստին»: Նա նշել է, որ Ռուսաստանը եւ Չինաստանը միջազգային խնդիրների վերաբերյալ շատ մոտ կամ գործնականում համընկնող տեսակետներ ունեն:
Վլադիմիր Պուտինը նաեւ հայտնել է, որ Ռուսաստանը պատրաստ է Չինաստանին աջակցել այս տարի G20-ի նախապատրաստման եւ անցկացման գործում:
«Ինտերֆաքսը» հայտնում է, որ ՉԺՀ-ի ղեկավար Սի Ցզինպինը Ռուսաստանի նախագահ Վլադիմիր Պուտինին հրավիրել է չինական Հանչժոուում G20-ի գագաթնաժողովին:
«Ես նախագահ Պուտինին այս տարվա սեպտեմբերին արդեն հրավիրել եմ չինական Հանչժոու քաղաք «քսանի խմբի» գագաթնաժողովին մասնակցելու», - լրագրողներին հայտնել է Սի Ցզինպինը:
Ավելի վաղ երկկողմ բանակցությունների ընթացքում ռուսաստանյան նախագահը չինացի գործընկերոջը թանկագին բարեկամ է կոչել եւ նշել է, որ նման յուրաքանչյուր հանդիպում անցնում է կառուցողաբար եւ արդյունավետորեն:
ՉԺՀ-ի ղեկավար Սի Ցզինպինը նշել է, որ Ռուսաստանի եւ Չինաստանի միջեւ ռազմավարական գործընկերությունը եւ փոխգործակցությունը նպաստում են տարածաշրջանային եւ միջազգային քաղաքականության առողջ զարգացմանը: «Ես բարձր եմ գնահատում իմ եւ նախագահ Պուտինի ջանքերը նոր ժամանակաշրջանում երկկողմ հարաբերությունների ամրապնդման ուղղությամբ», - ընդգծել է ՉԺՀ-ի առաջնորդը, հայտնում է ՏԱՍՍ-ը:
Ընդլայնված կազմով բանակցություններին քննարկվել է Ռուսաստանի եւ Չինաստանի փոխգործակցության նոր կողմնորոշիչների մշակումը: Պուտինի խոսքով, երկրներն ի վիճակի են ավելի մեծ հաջողությունների հասնել գուղատնտեսության եւ բարձր տեխնոլոգիաների ոլորտում:
Օրակարգում Մոսկվայի եւ Պեկինի համագործակցությունն է տարբեր ոլորտներում: Մասնավորապես` ապրանքաշրջանառության, մեքենաշինության եւ էներգետիկայի հարցերը: Ակնկալվում է, որ ուղեւորության արդյունքը կդառնա ավելի քան 50 փաստաթղթի ստորագրումը: